Qazaqstandyq «Jaýjúrek Myń bala» jáne «Stýdent» fılmderi Kann kınofestıvalinde kórsetiletin bolady
ASTANA. 22 sáýir. QazAqparat - Rejısser Dárejan Ómirbaevtyń «Stýdent» fılmi Kann kınofestıvaliniń «Erekshe kózqaras» konkýrstyq baǵdarlamasyna alyndy. Eske sala keteıik, 65-shi Kann festıvali 16-27 mamyr aralyǵynda ótedi.
Bul týraly Mádenıet jáne aqparat mınıstrliginiń baspasóz qyzmetinen habarlandy.
Sh.Aımanov atyndaǵy «Qazaqfılm» kınostýdııasy túsirgen «Stýdent» fılmi álemniń Hýlıo Medem, Gaspar Noe jáne Ksave Dolan syndy myqty rejısserlerdiń ónimderine qarsy básekelestikke túsedi. Olardyń arasynan eń úzdigin «Erekshe kózqaras» baǵdarlamasy ádilqazylarynyń tóraǵasy - tanymal Gollıvýd juldyzy Tım Rot anyqtaıtyn bolady. Eske salsaq, D. Ómirbaev bıyl «Palma butaǵyna» úshinshi ret talasqa túsýde. 1998 jyly onyń «Kıller» fılmi «Erekshe kózqaras» baıqaýynda arnaıy syılyqqa ıe bolǵan edi. Al 2001 jyly festıvalde «Jol» atty kınotýyndysyn usynǵan. Bıylǵy «Stýdent» Dostoevskııdiń «Qylmys pen jaza» romanynyń jelisi boıynsha túsirildi.
Sonymen qatar, Kann festıvaliniń aıasynda 17 mamyrda taǵy bir qazaqstandyq kıno «Jaýjúrek Myń bala» kópshilik nazaryna usynylmaq. Sháken Aımanov atyndaǵy «Qazaqfılm» kınostýdııasynda túsirilgen belgili rejısser Aqan Sataevtyń «Jaýjúrek Myń bala» fılmi qazaqstandyq kórermender úshin 3 mamyr kúni kórsetile bastaıdy. Kópshilikti kúttirgen bul fılmde XVIII ǵasyrdyń birinshi jartysynda jońǵar shapqynshylyǵy, ondaǵy qantógisti shabýyldar, jankeshtilikpen jaýǵa qarsy kúresken batyrlarymyzdyń erligi baıandalady. Kıno jelisi boıynsha shaıqasta qazaq jasaqtary birigip, basqynshylarǵa toıtarys berip, maıdanda sheshýshi jeńisterge jetetini baıandalady.
