Qazaqstandyq jaýyngerdiń súıegi elge qaıtaryldy

NUR-SULTAN. QazAqparat - Máskeýde Qazaqstannyń Reseıdegi Elshiliginde Uly Otan soǵysy kezinde qaza tapqan qazaqstandyq jaýyngerdiń súıegin tapsyrý rásimi ótti, dep habarlaıdy QazAqparat.

Elshiliktiń resmı saıtynyń jazýynsha, i s-sharaǵa Elshiliktiń dıplomattary, «Atamnyn Amanaty» qoǵamdyq birlestiginiń, «Reseı izdeý qozǵalysy» uıymynyń, sondaı-aq qazaq dıasporasynyń ókilderi qatysty.

Jaýyngerdiń súıegin 2022 jyldyń 9 shildesinde Lenıngrad oblysynyń Tosnen aýdanyndaǵy «Zaslon» izdeý toby tapty. Jaýynger medalonynda saqtalǵan blankiniń arqasynda jaýyngerdiń jeke basy anyqtaldy - Dýzbaev Qaleı, 1902 jyly týǵan, Batys Qazaqstan oblysynyń týmasy.

Reseılik izdeýshiler «Atamnyn Amanaty» qoǵamdyq birlestigine habarlasyp, olar sarbazdyń týystaryn izdeýge kirisken, ókinishke oraı, olardy taba almaǵan. Jaqyn arada jaýyngerdi týǵan jerinde tolyq qurmetpen qaıta jerleý josparlanýda.

«Atamnyn Amanaty» qoǵamdyq birlestiginiń tóraǵasy Murat Moldaǵalıev bul kúnderi Kalýga oblysynda áskerı-tarıhı ekspedıtsııaǵa qazaqstandyq «Atamnyn Amanaty» biriktirilgen izdestirý jasaǵy alǵash ret qatysyp jatqanyn aıtty. Ol qazaqstandyq jáne reseılik izdestirý jasaqtarynyń birlesken jumysy jaqsaryp, tyń serpin alyp jatqanyna rıza ekenin jetkizdi.

Óz kezeginde «Reseı izdeý qozǵalysy» uıymynyń ókili Dmıtrıı Fedosov Qaleı Dúzbaevtyń týystary erte me, kesh pe tabylyp, beıitin zııarat ete alady degen úmitin jáne jaýynger taǵdyryna atsalysqandardyń barlyǵyna alǵysyn bildirdi.

Qazaqstandyq jáne reseılik izdeý jasaqtarynyń birlesken jumysy jalǵasatyn bolady.

Foto: kazembassy.ru