Qazaqstandyq jastardyń jobalaryna AQSh pen Eýropa elderinen suranys túsedi

ASTANA. QazAqparat - Serpindi jobalar - qarqyndy damýdyń kepili. Elimizde osyndaı ilkimdi joba jasaýshylar jeke kompanııalar quryp, báseke naryǵyna shyǵyp jatyr, dep habarlaıdy «Habar 24».

Ótken jyly 70-ke jýyq kompanııa «Startup Kazakhstan» halyqaralyq akseleratsııa baǵdarlamasynyń ekinshi kezeńine ótti. Óndiristi tsıfrlandyrý, qarjy tehnologııalary men elektrondy saýda. Jeti jyl buryn bulardyń barlyǵy baıaý damyp kele jatqan salalar edi.

Al búginde ınvestorlardy tartatyn ári kez kelgen iri korporatsııalardyń qyzyǵýshylyǵyn arttyratyn negizgi qural sanalady. Utymdy ári tyń bastamalar úshin ınvestorlar qomaqty qarjy bólýge ázir. Qazirdiń ózinde bastamashyl, talapty jastardyń ozyq oılaryna Eýrazııalyq ekonomıkalyq aımaqta, AQSh pen Eýropa elderinde suranys kóp.

«Anyǵyn aıtqanda, 10 startap-jobanyń tek biri ǵana qoldaý tabady dep oılaǵanbyz. Alaıda qazir serpindi jobalardyń basym bóligi ómirsheń dep tanylady. Olar belgili bir salaǵa engizilip, damyp keledi. Sol arqyly jeke kompanııanyń ósimi de jylyna 200-300% jetip otyrǵanyn kóremiz. Sóıtip, olardyń baǵasy artatyndyǵy qýantady», - deıdi «Almaty Techgarden» bas dırektory Sanjar Kettebekov.

Qazaqstandaǵy ekologııa men qorshaǵan ortanyń tazalyǵy ózekti másele. Bul jóninde jas ınjenerlerdiń óz oılary men usynystary bar. Ozyq tehnologııaǵa negizdelgen quraldar atmosferanyń lastanýyn ólsheıdi.

Sonymen birge salynyp jatqan energokeshenderdiń jobalaryn baǵalap, iri óndiris oryndarynyń ekologııalyq qaýipsizdigin anyqtaı alady.

«Ekologııalyq keshende birneshe modýl bar. ıAǵnı, modýl - aýdıt. Sonyń kómegimen biz kásiporynnyń ekologııaǵa keltirer zııanyn bile alamyz. Mysaly, óndiris qýatyn arttyryp, ónim kólemin ulǵaıtqan jaǵdaıda ol aýa tazalyǵyna qalaı áser etetinin tekserýge bolady», - deıdi ekologııalyq startap-joba avtorlarynyń biri Nurlan Daıyrov.

Jasyl ekonomıka men agroónerkásiptik keshendi damytýda jastar jaǵy belsindilik tanytyp keledi. Mysaly arnaıy baǵdarlama júıesi bar mobıldik qosymsha. Sonyń kómegimen sharýalar alqaptardy aralamaı, ýaqyt jumsamaı egistik ahýaly týraly aqparat alyp otyrady.

«Joba maqsaty - bizdiń aýylsharýshylyq ónimderine ǵaryshtan baqylaý júrgizý. Ǵarysh apparattar sýretke túsirip, jer bederin óńdep, sońǵy paıdalanýshyǵa onyń vegıtatsııasy, ylǵaldyǵy boıynsha jáne ósimdiktiń statýsy boıynsha málimetter alady», - deıdi , Nazarbaev zııatkerlik mektebiniń ǵylymı zertteýshisi Jandos Kerimqulov.