Qazaqstandyq jastardyń 70 paıyzdan astamy memlekettik tilde erkin sóıleıdi

ASTANA. QazAqparat - Memlekettik tildi damytý qory jastar arasynda memlekettik tildi meńgerý deńgeıin anyqtaý maqsatynda «www.soyle.kz» ınternet-portalynyń paraqshasynda áleýmettik saýalnama ótkizdi.

Saýalnamaǵa qatysýshylarǵa memlekettik tildi meńgerý deńgeıine qatysty birneshe jaýap nusqalary usynyldy. Saýalnama nátıjesi jastardyń 77.7% qazaq tilinde erkin sóıleıtinin, 10.3 % aýyzeki sóıleý deńgeıinde biletinin kórsetti, 5 % «túsinemin, biraq sóıleı almaımyn» - dep jaýap berse, 3.7 % «birneshe sózderdi ǵana bilemin, jáı sóılemderdi túsinemin» - degen, al 1.6 % qazaq tilin múldem bilmeımin dese, 1.7 % «bilmeımin, biraq úırenýdi bastaımyn» - degen nusqasyn tańdaǵan.

Áleýmettik saýalnamanyń qorytyndysy qazaqstandyq jastardyń 70 paıyzdan astamy memlekettik tildi jetik meńgergenin kórsetedi.

Saýalnamaǵa elimizdiń barlyq aımaqtarynan 5 myńǵa jýyq 18 den 30 jasqa deıingi jastar qatysty.

Bıyl elimizde qazaq tiline memlekettik til mártebesin bergen «Til týraly» Zańnyń qabyldanǵanyna jıyrma bes jyl tolady.

Qazaq tiliniń qoldanys aıasyn keńeıtý máselesi táýelsizdigimizdiń alǵashqy kúnderinen kún tártibinen túspeı keledi. Búgingi tańda qazaq tili jastar arasynda kúndelikti qarym-qatynas tiline aınaldy. Elimizdiń 60 paıyzdan astam oqýshylary memlekettik tilde bilim alýda.

Esterińizde bolsa, www.soyle.kz portaly qazaq tilin tegin úıretý maqsatynda ótken jyldyń aıaǵynda ashylǵan bolatyn. Ashylǵaly beri bes aıdyń ishinde osy portalda tirkelgen qazaq tilin úırenýshiler sany 9 myńǵa jetip, portalmen elimizdiń barlyq aımaqtary men men shet elderden 80 myńǵa jýyq adam kirip tanysty, dep habarlaıdy Memlekettik tildi damytý qorynyń baspasóz qyzmeti.