Qazaqstandyq jastardy qoldaýǵa arnalǵan is-sharalar aıqyndaldy
«Jastar máselesi – bizdiń memlekettik saıasattaǵy basym baǵyttardyń biri. 2020 jyly jastar saıasaty salasynda kóptegen jumystar atqaryldy, naqty nátıjelerge qol jetkizildi. Jastar jyly aıasyndaǵy jol kartasy sheńberindegi sharalar kesheni iske asyrylyp, «Qazaqstan 2020: bolashaqqa jol» Qazaqstan Respýblıkasy Memlekettik jastar saıasatynyń 2020 jylǵa deıingi tujyrymdamasyn iske asyrý aıaqtaldy», - dedi Sh. Baımanov QR AQDM janyndaǵy Jastar uıymdaryn damytý jónindegi úılestirý keńesiniń onlaın-formattaǵy otyrysynda.
Onyń aıtýynsha, 2020 jyly júrgizilgen keń aýqymdy ǵylymı-zertteý jáne taldaý jumystarynyń basym bóligi 2021 jyly bastatyn, josparlanyp otyrǵan memlekettik jastar saıasaty týraly qoldanystaǵy zańnamany jetildirý úshin naqty negizderdi aıqyndady jáne jańa qurylym men formattan basqa, qoldanbaly sıpatqa baǵyttalǵan «Qazaqstan jastary – 2020» Ulttyq baıandamasyn daıyndaý barysynda qoldanyldy. Áleýmettik zertteýdiń qorytyndylary boıynsha jastar qundylyqtarynyń qurylymynda birneshe jyl boıy otbasy, densaýlyq jáne dostyq qundylyqtarynyń basymdyǵy saqtalyp otyr.
Sonymen qatar Sh. Baımanov jastar men otbasy saıasaty salasynda 2021 jylǵa josparlanǵan qadamdarǵa toqtaldy. Osy oraıda «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasyn ázirleý, Jastardy qoldaýdyń 2025 jylǵa deıingi Keshendi jospary men «Táýelsizdik urpaqtary» ulttyq jobasyn júzege asyrý, sondaı-aq granttyq ári áleýmettik jobalardy qamtý eskerilgen.
Munymen qosa, «Qazaqstan jastary – 2021» ulttyq baıandamalardy daıarlaý, «Jastardyń damý ındeksin» ázirleý jáne engizý qamtylyp otyr.
«Bıyl «Zeren-2021 Táýelsizdik urpaqtary» respýblıkalyq jastar bilim berý jastar lagerin uıymdastyrý qarastyrylyp otyr», - dedi komıtet basshysy.
Sonymen qatar ol bıylǵa josparlanǵan halyqaralyq is-sharalarǵa toqtaldy.
Bul rette «Túrkistan – túrki áleminiń besigi» túrkitildes elderi jastar kóshbasshylarynyń halyqaralyq sammıti, Azııadaǵy ózara is-qımyl jáne senim sharalary keńesine (AÓSShK) múshe memleketter jastar forýmy, Qazaqstan men Reseı volonter uıymdary lıderleriniń qatysýymen eriktiler keńesi ótkizilmek.
