Qazaqstandyq jastar jumys istegisi kelmeıdi - sarapshy
ASTANA. QazAqparat - «Jastar» ǵylymı-zertteý ortalyǵynyń dırektory, saıası ǵylymdar kandıdaty Talǵat Qalıev Qazaqstan jastary arasyndaǵy birqatar túıitkilderdi aıtyp berdi, dep habarlaıdy «QazAqparat» HAA tilshisi.
Atap aıtqanda, zertteýlerge negizdelgen basty máselelerdiń biri - qazaqstandyq jastardyń jumysqa, tutas ómirge degen kózqarasy.
«Elimizde qoǵamnan shettep qalǵan nemese margınaldy jastardyń 9% bar, olar álemde bar jáne onyń sany artyp keledi. Biraq bizdiń margınaldy jastarymyzdyń túsinigi batysqa qaraǵanda ózgeshe. Batysta bul sanaly túrde tańdalǵan jol, narazylyq bildirýdiń bir túri. Al bizdiń eldiń margınaldary jumys isteýdiń qajeti joq dep sanaıdy. Nege? Sebebi, bul máseleni ata-anasy sheshý kerek dep oılaıdy. Jastardyń kópshiligi jumystyń joqtyǵynan emes, jumystyń abyroıly bolmaýynan sendelip júr. Barlyǵy eńbek jolyn daıashy bolyp bastaýdan qashady, birden «kresloǵa» jaıǵasqysy keledi. Batysta joǵary bilimi bar adamdar kez kelgen jumysty atqarýdan qymsynbaıdy, sebebi olarǵa kún kórý kerek, týystarynan kómek joq. Al bizdiń jastar dıvanda shalqaıyp jata alady», - deıdi Talǵat Qalıev.
Sonymen birge, ǴZI basshysy jastardyń tamyr-tanyssyz jumysqa ornalasý múmkin emes dep oılaıtynyn, bul túsiniktiń qalyptasýyn jastardyń úlken ómirge qadam basqysy kelmeýimen túsindirdi.
«Qazaqstan jastarynyń 60% astamy memleket materıaldyq kómek berýi tıis dep oılaıdy. 92% jastar tamyr-tanyssyz jumysqa ornalasý múmkin emes dep esepteıdi jáne ózdigimen jumysqa ornalasýǵa umtylmaıdy da. Meniń kóptegen dostarym kadr izdep júredi, meniń ózimnen birneshe ret jas mamandar taýyp berýdi surady. Demek, kadr tapshylyǵy barlyq jerde sezilip otyr. Al jastar tamyr-tanysy jetektep aparyp, jumysqa ornalastyratynyn kútip júr. Bálkim, bul taptaýryn uǵym jastardyń eseıgisi kelmeýinen týyndaǵan shyǵar», - deıdi ol.
Talǵat Qalıev ózine jetkilikti túrde kóńil bólinbegen jastardyń radıkaldy áreketterge baratynyn jáne olarǵa materıaldyq kómekten buryn rýhanı qoldaý bildirýdiń mańyzy zor ekenin atap ótti.
«Jastar ishki kúızeliske jıi ushyraıdy jáne óz jolyn adaspaı tabýǵa muqtaj. Kásibı turǵyda belgili bir deńgeıge qol jetkizip, qoǵamdaǵy óz ornyn tapqanda ǵana adam ózine senimdi jáne baısaldy bolady. Jastar ózine nazar aýdarylmaǵandyqtan radıkaldy, tipti ekstremaldy ıdeıalarmen aınalysa bastaıdy, olar moraldy-psıhologııalyq qoldaýǵa asa muqtaj. Keı kezderi aqshadan buryn dál osyndaı qoldaýlar aýadaı qajet», - dep túıindedi óz sózin sarapshy.
