Qazaqstandyq jastar Sochıde ótken «Kınotavrık» halyqaralyq baıqaýynda 12 júlde jeńip aldy

Atalmysh sharaǵa elimizden 16 bala qatysqan. Atap aıtqanda, 7 men 16 jas aralyǵyndaǵy "Tańsári" mıýzık-shoý teatrynyń jas ártisteri óner kórsetti. Olar Bas júldeni, birinshi, ekinshi jáne eki úshinshi oryndy, sonymen qatar ádil qazylar alqasynyń jeti arnaıy syılyǵyna ıe boldy. Bas júldeni «Mıster Kınotavrık» atalymy boıynsha, teatrdyń eń jas ártisi, jeti jasar Arýan Barakaev enshiledi. Barlyq qatysýshylar «Sán teatry» atalymynyń ekinshi dárejeli laýreattary atanǵan. Uıymdastyrýshylarǵa qazaqstandyq kıim sán úlgileri de qatty unaǵandyqtan, olar merekeniń ashylý saltanatynda da óner kórsetken.

«KınoMark» kompanııasynyń uıymdastyrýymen ótken festıvalge TMD elderinen kelgen oryndaýshylar men balalar shyǵarmashylyq ujymdary qatysqan. Olar vokal, horeografııa, teatr óneri, sporttyq jarystar boıynsha saıysqa túsken. Tóreshiler quramyna tanymal kompozıtorlar, horeograf, akterler, modeler men prodıýserler jáne ataqty rejıserler kirgen.

Jas ártister: "Bul sapar Almaty jáne Almaly aýdany ákimdiginiń, sonymen qatar demeýshilik kórsetken jeke tulǵalardyń kómeginsiz bolmas edi",-dedi.

Jobanyń basty nátıjesi - uıymdastyrýshylardyń kelesi jylǵy festıvaldi Qazaqstanda ótkizý jónindegi usynystary bolǵan.