Qazaqstandyq jastar álem chempıonatynda kimniń ornyn ıelenetini anyqtaldy
ASTANA. QazAqparat - AQSh-tyń Baffalo qalasynda hokkeıden ótip jatqan jastar arasyndaǵy álem chempıonatynda Belarýs quramasy týrnırde qalý úshin Danııaǵa qarsy ótkizgen eki oıynda (4:5, 2:3 B) jeńilip, elıtalyq dıvızıonnan shyǵyp qaldy. Belarýstiń ornyn Qazaqstan ıelenedi, dep habarlaıdy QazAqparat Sports.kz">Sports.kz -ke silteme jasap.
Jastardyń kelesi álem chempıonaty Vankýver jáne Vıktorııa qalalarynda ótedi. Álem birinshiligi 2018 jylǵy 26 jeltoqsannan 2019 jylǵy 5 qańtarǵa deıin jalǵasady. Oǵan: Qazaqstan, Kanada, Chehııa, Shvetsııa, AQSh, Reseı, Fınlıandııa, Slovakııa, Shveıtsarııa jáne Danııa quramalary joldama alǵan.
Eske sala ketsek, Kýrshevelde ótken álem chempıonaty birinshi dıvızıonynyń «A» tobynda Qazaqstan jastar quramasy bes oıynda bes jeńiske jetip, elıtaǵa joldama alǵan bolatyn.
