Qazaqstandyq jasóspirimder tennısten Azııa birinshiliginiń fınalyna shyqty
NUR-SULTAN. QazAqparat – Qazaqstandyq jasóspirimder elordadaǵy «Dáýlet» tennıs ortalyǵynda 12 jasqa deıingiler arasynda Azııa komandalyq birinshiliginiń fınalyna shyqty, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, 17 qyrkúıek kúni Azııa chempıonatynyń fınalynda qazaqstandyq uldar men qyzdar Taıland quramasymen bas júldeni sarapqa salady.
Sońǵy oıynda uldar Gonkong, qyzdar Malaızııa komandasyn 3:0 esebimen tize búktirdi.
«Bizdiń fınaldaǵy qarsylasymyz myqty. Soǵan qaramastan, jeńis tuǵyryna kóterilý úshin bar kúshimizdi salamyz», dedi qyzdar quramasynyń múshesi Lınara Bólesheva.
Robert Kamınskıı de el namysyn qorǵaý úlken abyroı ekendigin aıtyp, jarysqa daıyndaǵan bapkerler men komanda kapıtanyna alǵysyn jetkizdi.
Eske sala keteıik, budan buryn Elena Rybakınanyń Slovenııadaǵy jarystyń jartylaı fınalyna shyqqanyn jazǵan bolatynbyz.
