Qazaqstandyq jasóspirimder órt sóndirý-qutqarý sportynan álem chempıonatynda úzdik úshtikke ilikti

ORAL. QazAqparat – Qazaqstandyq jasóspirimder Brest qalasynda (Belarýs) órt sóndirý-qutqarý sportynan ótken XI álem chempıonatynda tabysty óner kórsetti, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkendeı, dúnıejúzilik dodaǵa Qazaqstan, Reseı, Belarýs, Belarýs-2, Slovakııa jáne Úndistan komandalary qatysyp, baq synady.

Jalpykomandalyq esepte Reseı jeńis tuǵyryna kóterilse, Belarýs ekinshi, Qazaqstan úshinshi orynǵa ıe boldy.

Qazaqstan quramasy sapynda Batys Qazaqstan oblysynan Oral qalasyndaǵy №20 orta mektep oqýshylary Abylaı Serikov pen Ernur Nasıbýllın el namysyn qorǵady.

Kedergi jolaqtarymen 100 metrdi baǵyndyrýda Abylaı men Ernur fınalǵa shyqty. Abylaı álem chempıonatynyń qola júldegeri atansa, Ernur tórtinshi orynǵa taban tiredi.

Jaýyngerlik qanat jaıýdan Ernur Nasıbýllın Qazaqstan quramasy sapynda ekinshi orynnan kórindi.

Eske sala keteıik, budan buryn qazaqstandyq jas tennısshilerdiń halyqaralyq týrnırlerde úzdik shyqqanyn jazǵan bolatynbyz.