Qazaqstandyq jasaqtaýshylar

Onyń sheteldik oıyndardan ereksheligi  - onyń negizgi mazmuny mádenı-aǵartýshylyq maqsatqa baǵyttalyp otyrǵandyǵynda. Atalmysh otandyq jobanyń tanystyrylymyn 25 qarasha kúni Astanada "Konsalt-Info NS" kompanııasynyń dırektory Danıla Pleshkov pen "Kaznetmedia" JShS kommertsııalyq dırektory Pavel Fedotov "Kreatıvti ultty qalyptastyrýdyń joldary men tetikteri" atty halyqaralyq semınar-konferentsııada jasady.

Aıta ketken jón, bul osy salada memleket tarapynan qoldaý tapqan alǵashqy bastama. Osy ıdeıa otandyq jasaqtaýshylarǵa dúken sórelerinde adamdardy ábden mezi qylǵan bir-birine uqsas jańa oıyndarǵa qarap otyrǵan kezde dúnıege kelgen. Olardyń sózderine qaraǵanda, búgingi tańda oıyndardyń avtorlary ózderiniń eptiligi men qııalyn joǵaltqan.

P.Fedotovtyń oıynsha, kóshpendiler órkenıetiniń mádenıeti vırtýaldy álemge jańa lep bere alar edi.

"Sıýjette Qazaqstanda jáne oǵan kórshiles jatqan memleketterde baǵzy zamandardan beri meken etken kóshpeli taıpalardyń mádenı, tarıhı murasyn qoldaný - óte keremet ıdeıa. Biz Qazaqstan azamattarymyz, elimizdiń mádenıetin qatty jaqsy kóremiz jáne ol týraly kóbirek jar salǵymyz keldi. Bir sózben aıtqanda, biz óz-ózimizdi nasıhattaýǵa tyrystyq",-deıdi P.Fedotov.

Jasaqtaýshylar oıyn shynaıy bolady dep sendirýde. Qalaı bolǵannyń ózinde, en dalanyń sol bir kórinisin, ony meken etken halyqtyń ómir-salty men bet-beınesin salýǵa tyrysqan. Jalpy vırtýaldy álem 2,5 mln. astam sharshy shaqyrymdy quraıdy. Úırenshikti oıyndarda bolatyn qamaldy qorǵaý mıssııasy emes, otandyq ónimde kóshpeli turmys-salt modeli usynylǵan. Oınap otyrǵan adamǵa árdaıym kóship-qonýǵa týra keledi. Sebebi jaıylym sııaqty tabıǵı resýrstar paıdalanǵan saıyn sarqyla beredi jáne shekteýsiz tutynýǵa kelmeıdi. Oıyn XII-XVII ǵasyrlar arasyndaǵy ýaqytty qamtıdy.

Onda belgili bir tapsyrmalardy oryndaý, tarıhı sıýjetterden ótý nusqalary mindetti túrde bolady. Biraq negizinen oıynshy orta ǵasyrlyq kóshpendiniń keıpine enedi, surapyl zamannyń barlyq kedergilerin ózi tatyp kórgendeı kúıge bólenedi. Oǵan jeke ómir keshýge nemese alıans quryp, mańaıyna pikirlesterin jınaýǵa bolady.

Danıla Pleshkov oıynnyń basqa nusqasyna da egjeı-tegjeıli toqtaldy. Onyń aıtýynsha, eger oıynshy otyryqshylyqqa jaramdy aımaq tapsa, basqa ómir saltyna kóshe alady. Alaıda onyń aldynda basqa mindetter men problemalar týyndaıdy. Onyń ózine qaraǵanda, bul nusqa klassıkalyq oıyn úlgisine úırenisip qalǵan geımerlerge arnalady.

Oıyn personajdary óz aldyna bir taqyryp. "Kóshpendilerde" jaýyngerlerdiń úsh túri men jumysshy sarbaz bar. Sonymen qatar jasaqtaýshylar qyzyqty ıýnıtterdi engizip otyr, olardyń biri - kóshpendi-aqyn. Onyń moınyna dıplomatııalyq mıssııa júktelgen. Basqa da keıipkerler bar. Máselen, oıyn ishinde jabaıy túz taǵylarynan bastap, arýaqtarǵa deıin kórýge bolady.

D. Pleshkov pen P. Fedotovtyń aıtýynsha, atalmysh oıyn qalyń kópshilik aldyna kelesi jyldyń sońynda jol tartady.