Qazaqstandyq jas tennısshiler Mınskidegi halyqaralyq týrnırde júldeger atandy
NUR-SULTAN. QazAqparat – Qazaqstandyqtar Ámir Omarhanov pen Zara Dárken juptyq synda 13-19 naýryz aralyǵynda Mınskide «Tennis Europe Junior Tour» serııasy boıynsha jaóspirimder arasynda ótken halyqaralyq týrnırde tabysty óner kórsetti, dep habarlaıdy QazAqparat tilshisi.
Qazaqstan tennıs federatsııasy málim etkenindeı, jarysqa Belarýs qana emes, sondaı-aq basqa da kóptegen elderden 14 jas jáne odan kishi sportshylar qatysty.
Á.Omarhanov Belarýs ókili Rýslan Kostıýkevıchpen birge alǵashqy kezdesýlerinde týrnırdiń 2-raketkalary, reseılikter Egor Gorın men Ilıa Maltsevti 6:3, 0:6, 10:7 esebimen tize búktirip, aıdy aspanǵa shyǵardy. Shırek fınalda armenııalyq Mıkael Avanesıan men belorýssııalyq Stanıslav Býlbıankovty 6:2, 6:2 esebimen utty. Jartylaı fınalda Á.Omarhanov pen R.Kostıýkevıch chehııalyq Jozef Sedlar men reseılik Maksım Vlasovty joldan taıdyrdy – 6:7 (5), 6:2, 10:5. Tek fınalda ǵana dodanyń 1-raketkalary, reseılikter Tımofeı Derepasko men Egor Pleshıvtsevke 4:6, 5:7 esebimen ese jiberdi.
Qyzdar arasynda germanııalyq Anastasııa Nesterovıchpen jup qurǵan Z.Dárken de fınalǵa deıin jetti.
Qazaqstandyq-germanııalyq jup áýeli ýkraınalyq Stefanııa Pýshkar men qazaqstandyq Sofıa Isakovany jeńdi – 6:3, 7:5. Shırek fınalda jarysta 4-raketka bolyp tirkelgen reseılikter Anastasııa Rojkova men Anna Snegırevadan basym tústi – 6:4, 6:2. Jartylaı fınalda qarsylastary kortqa shyqpaǵandyqtan, sońǵy synǵa joldama alǵan Z.Dárken men A.Nesterovıch fınalda týrnırdiń 1-raketkalary, reseılikter Darıa Bochkova men Ksenııa Smırnovaǵa tartysty matchta 5:7, 4:6 esebimen jol berdi.
Osylaısha Qazaqstan jasóspirimder quramasynyń músheleri Á.Omarhanov pen Z.Dárken halyqaralyq týrnırde ekinshi júldege ıe boldy.
Eske sala keteıik, budan buryn AQSh týrnırinde 6 qazaqstandyq baq synaıtynyn, qazaqstandyq juptyń Antalııa týrnıriniń jartylaı fınalyna shyqqanyn jazǵan bolatynbyz.
.
