Qazaqstandyq jas tennısshiler halyqaralyq týrnırlerde jaqsy nátıje kórsetti
NUR-SULTAN. QazAqparat – Qazaqstandyq Zara Dárken, Qaraqat Qoılybaeva jáne Ádemi Amankeldi ITF Juniors týrnırlerinde jaqsy nátıje kórsetti, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, Cholpon-Ata (Qyrǵyzstan) jáne Karfagen (Týnıs) qalalarynda 18 jasqa deıingiler arasynda halyqaralyq jarystar márege jetti.
Týnıstegi tórtinshi sanattaǵy dodada Aqtóbe tennıs mektebiniń túlegi, 14 jasar Zara Dárken fınalıst atandy. Ol bas júlde úshin sońǵy básekede ǵana kort ıesi Mereım Ben Ezedeınge jol berdi – 4:6, 7:5, 5:7.
Bıyl jyl basynda Zara bapkerlik shtabymen birge 18 jasqa deıingiler arasynda ITF jarystarynda oınaýdy uıǵardy. Karfagendegi fınal – ázirge onyń úzdik kórsetkishi.
Cholpon-Atada besinshi sanattaǵy dodada Shymkent tennıs mektebiniń túlekteri qýantty. 16 jasar Ádemi Amankeldi jekeleı synda fınalǵa deıin jetip, tartysty matchta qyrǵyzstandyq Vladıslava Andreevskaıadan utyldy – 1:6, 6:1, 6:7 (1:7). Al 15 jasar Qaraqat Qoılybaeva juptyq synda V.Andreevskaıamen birge fınalda reseılikter Anastasııa Kosheleva – Inga Zegeni jeńip, chempıon atandy – 6:4, 7:5.
Taǵy bir qazaqstandyq Sandýǵash Kenjebaeva Ýımbldon jasóspirimder týrnıriniń ekinshi aınalymyna shyǵa almady. Ol amerıkalyq Aleksıs Blohınaǵa ese jiberdi – 3:6, 3:6. Bul Sandýǵashtyń óz sporttyq jolyndaǵy alǵashqy «Úlken dýlyǵa» jarysy edi. Degenmen Sandýǵash Arýjan Saǵyndyqova jáne Janel Rústemovamen birge Ýımbldonnan kete qoıǵan joq. S.Kenjebaeva J.Rústemovamen, A.Saǵyndyqova serbııalyq Andrea Obradovıchpen birge juptyq synda óner kórsetedi. Jerebe búgin tartylady.
Eske sala keteıik, budan buryn tennısshi Dmıtrıı Popkonyń Ispanııadaǵy jarystyń chempıony atanǵanyn, elordada Prezıdent kýbogy úshin tennısten halyqaralyq týrnırler ótetinin jazǵan bolatynbyz.
Foto: ktf.kz
