Qazaqstandyq jas tennısshiler halyqaralyq týrnırlerde chempıon atandy
NUR-SULTAN. QazAqparat – Qazaqstandyq jas tennısshiler ITF jáne Tennis Europe týrnırlerinde chempıon atandy, dep habarlaıdy QazAqparat tilshisi.
Qazaqstan tennıs federatsııasynan málim etkendeı, Shymkent qalasynda 18 jasqa deıingiler arasynda úshinshi sanattaǵy ITF jarysynda qazaqstandyqtar Asyljan Arystanbekova men Aııa Nupbaı juptyq synda úzdik shyqty.
Olar fınalda qazaqstandyq Ásem Shoıbek pen úndistandyq Madhýrıma Savantty 6:4, 6:4 esebimen jeńdi.
Germanııanyń Gladbek qalasynda 18 jasqa deıingiler arasynda ekinshi sanattaǵy ITF týrnırinde Arýjan Saǵyndyqova, Maksım Batıýtenko, Sandýǵash Kenjebaeva, Janel Rústemova fınalıst atandy.
Arýjan jekeleı synda tartysty ótken sońǵy básekede dodanyń birinshi raketkasy, argentınalyq Lýchıano Maıonaǵa jol berdi – 6:4, 3:6, 3:6.
Maksım Batıýtenko ýkraınalyq Ilıa Maksımchýkpen birge jarys kóshbasshylary, aýstrııalyq ıAn Kobırskıı men japonııalyq Reı Sakamotodan utyldy – 2:6, 2:6.
Sandýǵash Kenjebaeva Janel Rústemovamen birge sýper taı-breıkte ǵana germanııalyqtar Djosı Dıms – Tea Lýkıchke ese jiberdi – 3:6, 6:3, 7:10.
Esesine Armenııa astanasy Erevanda 12 jasqa deıingiler arasynda ekinshi sanattaǵy Tennis Europe saıysynda qazaqstandyqtar qarsylas shydatpady.
Taza qazaqstandyq fınalda Robert Kamınskıı men Gıorgı Bregvadze juptyq synda Aleksandr Sofrygın men Dıas Tólepbergenovten aılasyn asyrdy – 6:3, 6:4.
Jekeleı synda taǵy bir qazaqstandyq Rodıon Traıgel R.Kamınskııdi qapy qaldyrdy – 6:3, 7:6 (7:4). Bul qaraǵandylyq R.Traıgeldiń jekeleı syndaǵy Tennis Europe dodasyndaǵy alǵashqy tıtýly edi.
Osy Erevanda Lınara Bólesheva tartysty ótken fınaldyq básekede reseılik Vıktorııa Hasteevadan jeńilip qaldy – 3:6, 6:3, 2:6.
Grýzııada 14 jasqa deıingiler arasynda úshinshi sanattaǵy Tennis Europe dodasynyń fınalynda aqtóbelik Eva Korysheva jarystyń birinshi raketkasy, reseılik Vlada Gýrylevanyń saǵyn syndyrdy – 6:7 (8:10), 6:2, 6:1.
Bul – Evanyń osyndaı ekinshi tabysy.
Taǵy bir qazaqstandyq ıAna Shtoda rýmynııalyq Eva Tışenkomen birge fınalda reseılikter Sofıa Nosonova – Darıa Pashkevıchti bas júldesiz qaldyrdy – 6:1, 6:2.
Eske sala keteıik, budan buryn Anna Danılınanyń Ispanııadaǵy jarystyń jeńimpazy atanǵanyn , qazaqstandyq tennısshiniń AQSh-taǵy týrnırdiń jartylaı fınalyna ótkenin jazǵan bolatynbyz.
