Qazaqstandyq jas tennısshiler Bishkekte ótken týrnırde chempıon atandy
NUR-SULTAN. QazAqparat – Qazaqstandyq jas tennısshiler Bishkek qalasynda jasóspirimder arasynda ITF aıasynda ótken besinshe sanattaǵy (U-16) halyqaralyq týrnırde chempıon atandy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, Danııl Felker jekeleı synda fınalda osy dodanyń 1-raketkasy, ırandyq Kasr Rahmanımen kúsh synasty.
Asa tartysty ótip, úsh saǵatqa sozylǵan matchta qazaqstandyq tennısshi 6:4, 5:7, 6:3 esebimen jeńiske jetti.
Qyzdar arasynda Ásem Shoıbek jekeleı synda fınalda jarystyń birinshi raketkasy, qyrǵyzstandyq Vladıslava Andreevskaıaǵa 1:6, 0:6 esebimen ese jiberdi.
Juptyq synda qazaqstandyqtar Elena Kım men Stefanııa Shalahova úzdik shyqty. Olar sheshýshi básekede taǵy bir qazaqstandyq ıAna Kýznetsova men reseılik Ksenııa Logvınany 6:2, 6:2 esebimen tize búktirdi.
Bul D.Felker, E.Kım jáne S.Shalahova úshin bıylǵy jyldaǵy alǵashqy tıtýldary edi.
Eske sala keteıik, budan buryn Zańǵar Nurlanulynyń Majarstanda ótken jarystyń jeńimpazy atanǵanyn, Mıhaıl Kýkýshkınniń US Open negizgi týrnırine óte almaı qalǵanyn jazǵan bolatynbyz.
M.Kýkýshkın irikteý saıysynda utylyp qalǵanymen, US Open dodasynda oınaıtyn boldy. AQSh ashyq chempıonatyna qatysýshylardyń biri bas tartqandyqtan, ornyna qazaqstandyq tennısshi shaqyryldy. Ol alǵashqy aınalymda ıspanııalyq Pablo Andýharmen sheberlik baıqasady.
