Qazaqstandyq jas tennısshi Grýzııada ótken týrnırdiń chempıony atandy
NUR-SULTAN. QazAqparat – Qazaqstandyq Ámir Omarhanov Grýzııa astanasy Tbılısıde jasóspirimder arasynda ótken Tennis Europe14&U úshinshi sanattaǵy týrnıriniń jeńimpazy atandy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, kópten beri birinshi ret Eýropadaǵy osyndaı jarystyń fınalynda qos qazaqstandyq, qaraǵandylyq Ámir Omarhanov pen almatylyq Artem Sıdorov bas júldeni sarapqa saldy.
Jartylaı fınalda Ámir atalmysh dodanyń 3-raketkasy, reseılik Mıhaıl Sapojnıkovti tas-talqan etti – 6:0, 6:0. Artem belorýssııalyq Tımofeı Glýshkony 6:1, 6:2 esebimen ońaı jeńdi.
Fınalda birinshi partııa tartysty órbip, onda breık jasaǵan Á.Omarhanov 7:5 esebimen basym tústi. Ekinshi setti de Qaraǵandy tennıs mektebiniń túlegi óz esebine jazdy – 6:2.
Á.Omarhanov pen A.Sıdorov juptyq synda da fınalǵa shyǵyp, tartysty ótken sońǵy básekede belorýssııalyq Stanıslav Býlbınko men ýkraınalyq Igor Soloveıge 4:6, 6:3, 7:10 esebimen ese jiberdi.
Tbılısıdegi tabysy arqasynda Á.Omarhanov jasóspirimder arasyndaǵy Eýropa reıtıngisinde birden 193 satyǵa joǵarylap, qazir 412-orynda tur.
Bul – Ámirdiń bıylǵy osyndaı ekinshi jeńisi.
Budan buryn onyń Túrkııadaǵy týrnırde jeńimpaz atanǵanyn jazǵan bolatynbyz.
Sondaı-aq Tımofeı Skatov Almaty týrnıriniń fınalynda jeńilip qaldy.