Qazaqstandyq jas taekvondoshylar Taıpeıde ótip jatqan Azııa chempıonatynda 7 medal ıelendi
ASTANA. QazAqparat - Taekvondodan Qazaqstan jasóspirimder quramasy Azııa chempıonatynda kózge tústi. Aǵa jattyqtyrýshy Bahytjan Raıbekovtyń shákirtteri 7 júldege qol jetkizdi, dep habarlanǵan Qazaqstannyń Taekvondo federatsııasy (WTF) saıtynda.
Jasóspirimder men kadetter arasyndaǵy Azııa birinshiligi kórshi Qytaı eliniń Taıpeı qalasynda ótýde. Aspan asty eline Qazaqstan quramasy jaqsy daıyndyqta attanǵan bolatyn. Jarystyń alǵashqy kúnderi jasóspirimder synǵa túsip, qazaqtyń ul-qyzdary sportsúıer qaýymdy tań qaldyrdy.
45 keli salmaqta óner kórsetken Birimbaı Eldar men 55 kelide synǵan túsken Anastasııa Ostrovskaıa fınalǵa shyqsa da, ókinishke oraı, jas órenderimizge tájirıbe men sáttilik jetispeı, olar qarsylastaryna jol berip qoıdy. Osylaısha, altyndy ýysynan shyǵaryp aldy.
Al qola júldege 5 birdeı sańylaǵymyz qol jetkizdi. Olardyń arasynda Joldaspaev Saǵdat (51 keli), Shymyrbaı Saǵynysh (55 keli), Qojahmet Nurqanat (68 keli), Qosmahanbet Botagóz (48 keli) jáne Qaıyrjanova Mádına (+68 keli) bar.
5 qola men 2 kúmis júldeniń arqasynda Qazaqstan jasóspirimder quramasy jalpykomandalyq esepte erler arasynda 4-shi orynnan, al qyzdar arasynda 6-shy orynnan kórindi.
