Qazaqstandyq jas shahmat juldyzy Reseı atynan synǵa túsedi
ASTANA. QazAqparat - Jas bolǵanyna qaramastan, qazaqstandyq Bıbisara Asaýbaeva shahmatta túrli jetistikterge qol jetkizip, álem juldyzyna aınaldy: 12 jasta ol túrli jas kategorııasyndaǵy mekteptik álem chempıonatynda úsh ret jeńiske jetti jáne segiz jasqa deıingi qyzdar arasynda ǵalamshar chempıony atandy. Týǵan eli - Qazaqstan chempıonattarynda da úzdik atandy. Rekordty jeti jasynda áıelder arasyndaǵy FIDE sheberi ataǵyn alǵan, dep jazdy sports.kz.
Alaıda, bıylǵy tamyz aıynan bastap, B.Asaýbaeva Reseı namysyn qorǵaıtyn bolady. Sergeı Nesterovtyń shaqyrtýymen, Máskeý oblysyndaǵy shahmat federatsııasyna qabyldanady. Qazir Bıbisara Hımkı qalasynda turyp jatyr.
Bıbisara 2004 jyly 26 aqpanda Taraz qalasynda dúnıege kelgen. Tórt jasynda atasynan shahmat oıynyn úırengen.
«Jáne sol jyly teledıdardan Kırsan Ilıýmjınovtyń Aleksandra Kostenıýkke altyn medal men shahmat tájin kıgizgenin kórip qaldym, - deıdi Bıbisara. - Sodan beri álem chempıony bolsam dep armandaı bastadym!».
