Qazaqstandyq jas mýzykanttar Túrkııada ótken halyqaralyq baıqaýdyń Gran-prıin jeńip aldy
ALMATY. Shildeniń 19-y. QazAqparat /Erlik Erjanuly/ - Túrkııadaǵy Qytaı elshiligi "Sáttilik tumary" halyqaralyq baıqaýynda kózge túsken 6 qazaqstandyq jas ónerpazǵa shildeniń 27-30-y kúnderi Beıjińde ótetin «Shyǵys marjandary» baıqaýyna joldama berdi.
"Alanıa qalasynda ótken bul baıqaýǵa 8 elden myńnan asa jas mýzykanttar, sýretshiler, bıshiler jáne ánshiler qatysty. Onda Ahmet Jubanov atyndaǵy daryndy balalarǵa arnalǵan qazaq orta mamandandyrylǵan mýzykalyq mektep-ınternattyń shákirtteri komandalyq esepte Bas júldege ıe boldy. Jekeleı synda Abzal Ádilhanuly, Qaınar Aıtmurat, Muqaǵalı Jánibekov, Kámıla Qarashova, Nurbek Meırambekov, Álibek Serikbolov pen Aqerke Tursynjan úzdik shyqty. Darhan Ábildın, Damır Beısenov, Arý Jaqsylyqqyzy, Dáýren Jumash, Nazerke Ibatjanova, Ajar Qadylbekova, Erbol Qojaǵul, Muhıt Nurǵumarov 2-shi oryndy jeńip alsa, Alpamys Bısenǵalıev, Almas Bolatov, Toǵjan Ábdiǵulova pen Muhammed Turdaly 3-shi oryn aldy. Sondaı-aq Lázzat Tileýlıeva, Erasyl Ámeshov jánem Toǵjan Ábdiǵulova dıplomant atandy", deıdi mektep dırektory Aqan Ábdýálıev.
Onyń aıtýynsha, "Sáttilik tumary" halyqaralyq baıqaýynyń 2-shi júldesi de qazaqstandyqtardyń enshisine tıgen. Oǵan Aqtaý qalasynan kelgen bıshiler toby ıe boldy. Onda qazaqstandyq jas ónerpazdardyń ónerine erekshe rıza bolǵan Túrkııadaǵy Qytaı elshiligi olarǵa tek arnaıy shaqyrtýmen ǵana qatysa alatyn "Shyǵys marjandary" baıqaýynyń 6 joldamasyn tabys etken. Shildeniń 27-30-y kúnderi Beıjińde ótetin bul baıqaýǵa qatysýshylar óz eliniń ulttyq ónerin nasıhattaýy tıis. Oǵan qatysatyn qazaqstandyq 6 ónerpaz endi shildeniń 31-i men tamyzdyń 4-i aralyǵynda Shanhaıda ótetin halyqaralyq jármeńkege qatysýshylardyń da tizimine engizilip otyr.
Jalpy bul mektep-ınternatta 2009-2010 oqý jylynda 465 oqýshy bilim aldy. Ótken oqý jyly kezinde olardyń 256-sy Qazaqstan, Reseı, Chehııa, Japonııa jáne Túrkııada ótken túrli deńgeıdegi baıqaýlardan laýreat atanyp, júldeger bolyp qaıtty.
