Qazaqstandyq jas matematıkter halyqaralyq olımpıadada top jardy
International Mathematics Competition (IMC) - 14 jasqa tolmaǵan, 4-8 synyp oqýshylary arasyndaǵy halyqaralyq matematıkalyq olımpıada. Olımpıadanyń negizgi qatysýshylary men uıymdastyrýshylary - Azııa elderi, onyń ishinde Malaızııa, Sıngapýr, Qytaı, Taıvan, Gonkong, Fılıppın, Taıland taǵy basqalar. Bıylǵy olımpıadaǵa Azııa elderinen bólek Kanada, Meksıka, Kıpr, Iran jáne Ońtústik Afrıka elderinen ókilder qatysty.
Álemniń 31 memleketinen kelgen jas matematıkter saıysyna Qazaqstan 2013 jyldan bastap turaqty qatysyp keledi. Qazaqstannyń bıylǵy komandasynda respýblıkanyń ár óńirinen iriktep alynǵan 16 oqýshy bar.
Olımpıada nátıjesinde qazaqstandyq matematıkter 5 júldeli jáne 7 ólsheýish (merıtov) oryndardy ıelendi. Atap aıtsaq, Raıymbek Baıshýaq - altyn, Ádı Sahantaev pen Baıseıit Esenbaı - kúmis, Oljas Mahajanov pen Dıas Arystanbek - qola medaldy enshiledi. Odan bólek, 7 ólsheýish oryn bar.
«Bul jetistik uzaq jylǵy daıyndyq pen úzdiksiz tájirıbe almasýdyń nátıjesinde keldi. Onyń ústine jyl saıyn qatysýshylardyń sany artqandyqtan, olımpıada sharttary men kezeńderi de qıyndaýda. Soǵan qaramastan bizdiń búldirshinder úmitti aqtap, Qazaqstanǵa bıyl birinshi ret altyn alyp berdi. Odan bólek, oqýshylar ózara bilim jarystyryp qana qoımaı, bir-birimen aralasyp, tájirıbe almasý múmkindigine ıe boldy», - dedi Qazaqstannan barǵan jas matematıkter komandasynyń jetekshisi Aıdyn Jambyl.