Qazaqstandyq jas kanoeshy álem chempıonatynda ekinshi medaldi jeńip aldy
ORAL. QazAqparat – Batysqazaqstandyq Marııa Brovkova kanoedan jastar arasynda Majarstannyń Seged qalasynda ótip jatqan álem chempıonatynda taǵy bir medaldi jeńip aldy, dep habarlaıdy QazAqparat tilshisi.
Sportshynyń anasy ári jeke bapkeri Elena Brovkova málim etkenindeı, Marııa 18 jasqa deıingiler arasynda bul joly 500 metr qashyqtyqta bir adamdyq kanoeda qola júldege ıe boldy.
Qazaqstandyq sportshy qytaılyq jáne majarstandyq kanoeshydan keıin máre syzyǵyn úshinshi bolyp qıyp ótti.
Osylaısha, Marııa Brovkova álem chempıonatynda ekinshi medaline qol jetkizdi. Ol keshe Qazaqstan tarıhynda tuńǵysh ret qyzdar arasynda álem chempıony atanǵan bolatyn.
Eske sala keteıik, budan buryn qazaqstandyq sportshynyń jasóspirimder arasynda álem chempıony atanǵanyn jazǵan bolatynbyz.
