Qazaqstandyq jas ǵalym Máskeýden jeńispen oraldy
ASTANA. QazAqparat - Jaqynda Reseı astanasy Máskeýde D.I.Mendeleevtiń 180 jyldyǵyna arnalǵan jas ǵalymdar konkýrsy bolyp ótti. Konkýrsqa Qazaqstannan ál-Farabı atyndaǵy Qazaq ulttyq ýnıversıtetiniń doktoranty Móldir Áýelhanqyzy qatysyp, birinshi oryndy jeńip aldy.
«Jas ǵalymdar jobasynyń konkýrsy 2007 jyldan bastap ótkizilip júr. Bul jobany júzege asyrý D.I.Mendeleev atyndaǵy Reseı hımııa qoǵamynyń prezıdenti, akademık Pavel Sarkısovtyń ıdeıasy bolyp tabylady. Birinshi konkýrs «Hımııa-2007» hımııa ónerkásibiniń halyqaralyq kórmesi aıasynda ótkizildi. Sodan beri ár jyl saıyn qoǵam Reseıdiń jáne TMD elderiniń hımııa-tehnologııalyq jáne tehnıkalyq ınstıtýttarynyń jas ǵalymdaryn jınaıdy.
Konkýrsqa hımııa, hımııalyq tehnologııa, munaı hımııasy, bıotehnologııa salalaryndaǵy jastardyń (ǵylymı dárejeleri joq, jasy 30-ǵa deıingi) jumystary qabyldanady. Ár uıym 5 jobaǵa deıin usynýǵa quqyly. Konkýrs jarııalanǵannan keıin ár jas ǵalym óz jumystaryn saraptaý komıssııasyna jiberedi. Eksperttik komıssııa jobalardy aldyn ala qaraıdy. Fınalǵa ótken jas ǵalymdar jumystaryn baıandama-tusaýkeser arqyly tanystyrady. Baǵalaý ólshemderi: taqyryptyń ózektiligi, jumystyń zerttelý deńgeıi, hımııalyq kásiporyn jáne keshender úshin praktıkalyq qyzyǵýshylyǵy, tanystyrý rásimi, tusaýkeserdiń kórkemdelýi, suraqtarǵa jaýap berýi bolyp tabylady.
Konkýrstyń uıymdastyrý komıtetine 24 uıymnan, sonyń ishinde Belarýs memlekettik tehnologııalyq ýnıversıteti, Volgograd memlekettik tehnologııalyq ýnıversıteti, Ivanov memlekettik hımııalyq-tehnologııalyq ýnıversıteti, ál-Farabı atyndaǵy Qazaq ulttyq ýnıversıteti, t.b. birqatar mekemelerden jobalar túsken.
Saraptama komıssııasy jobalardy aldyn ala qarastyryp, júldegerlerdi anyqtaǵan. Olar 21 jas ǵalym eken.
VIII Jas ǵalymdar jobasynyń konkýrsy «Hımııa-2007» hımııalyq ónerkásibiniń jáne ǵylymnyń halyqaralyq kórmesi osy jylǵy 23 qazanda Reseıdiń Máskeý qalasynda ótken. Árbir qatysýshy 10 mınýttyq baıandama jasap, sodan keıin qoıylǵan suraqtarǵa jaýap bergen. Qazylar qatysýshylardy 10 baldyq ólshemmen baǵalaǵan. M.Áýelhanqyzy barlyq qoıylǵan suraqtarǵa tolyq jaýap berip, birinshi orynǵa ıe boldy», - dep jazady «Egemen Qazaqstan» gazeti.
