Qazaqstandyq jas dzıýdoshylar álem chempıonatyn 12-orynda aıaqtady
ASTANA. QazAqparat - Chılıdiń Santıago qalasynda dzıýdodan kadetter arasynda ótken álem chempıonatynda otandastarymyz eki medal oljalady, dep habarlaıdy QazAqparat tilshisi.
Álemniń 64 elinen 428 jas sportshy qatysqan álem birinshiliginde Qazaqstan kadetter quramasy el qorjynyna 1 kúmis jáne 1 qola medal salyp, komandalyq esepte 12-orynnan kórindi.
Kúmis júldeni 60 kelide el namysyn qorǵaǵan Nurzat Sálimbaev jeńip aldy. Ol alǵashqy beldesýinde - Alıjandro Retımaldy (Chılı), ekinshi aınalymda - Kýrbonalı Bazarovty (Tájikstan), al 1/8 fınalda Tomas Koýzo Aspıtıany ıpponmen jeńip, jartylaı fınalǵa joldama aldy. Jartylaı fınalda mońǵol dzıýdoshysy Narmandah Baıanmýhty ıpponmen jeńip, fınalǵa shyqqan bolatyn. Fınalda reseılik Kazbek Nagýshevke ese jiberip, «kúmisti» qanaǵat tutty.
Ekinshi qola medaldy 81 kelide tatamıge shyqqan jerlesimiz Serikbolsyn Shyntas qanjyǵasyna baılady. Ol jubanysh beldesýinde taıpeılik Hsý Shıenandy ıpponmen jeńip, qola medal úshin kúresýge múmkindik aldy. Mańyzdy dodanyń qola medali úshin tájikstandyq balýan, kadetter arasynda Azııa chempıony Madjıdov Djohongırdi ıpponmen jeńip, álem chempıonatynyń qola júldegeri atandy.
Kadetter arasyndaǵy álem chempıonatyn birinshi orynda 12 medalmen Japonııa quramasy (3 altyn, 2 kúmis, 7 qola), ekinshi orynda 8 medalmen Germanııa quramasynyń sportshylary (3 altyn, 1 kúmis, 4 qola) jáne úshinshi orynda 6 medalmen (2 altyn, 1 kúmis, 3 qola) Reseı quramasy aıaqtady.
Komandalyq saıysta Qazaqstan kadetter quramasy alǵashqy aınalymda Reseı quramasyna jol berip, júldesiz qaldy. Álem chempıonatynyń komandalyq saıysyndaǵy úzdik úshtik mynadaı: І oryn - Reseı, ІІ oryn - Brazılııa, ІІІ oryn - Japonııa.
