Qazaqstandyq jas dzıýdoshy Eýropa kýboginiń jeńimpazy atandy
NUR-SULTAN. QazAqparat - Aýstrııanyń Leıbnıts qalasynda dzıýdodan jastar arasynda ótken ashyq Eýropa kýbogynda qazaqstandyqtar da júldesiz qalǵan joq, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, atalmysh dodaǵa 34 elden 600-den astam sportshy qatysyp, baq synady.
Qazaqstan jastar quramasy sapynda 34 jas tatamı sheberi el namysyn qorǵady.
Jarystyń alǵashqy kúni Ermek Amangeldi (66 kg) men Bolat Bilál (60 kg) fınalda ǵana súrinip, kúmis júldeger atandy.
Jeksenbi kúni qurama qorjynyna altyn medal da tústi. Aqmaral Naýatbek 48 kg salmaqta qarsylastarynyń barlyǵyn tize búktirip, chempıon atandy.
Sondaı-aq osy salmaqta Ǵalııa Tynbaeva júldegerler qatarynan kórinip, úshinshi orynǵa kóterildi.
