Qazaqstandyq jas boksshylar Serbııadan 10 altyn ákeldi (FOTO)
ASTANA. QazAqparat - Serbııada ótken 34-shi Golden Glove of Vojvodina halyqaralyq týrnırinen qazaqstandyq jas boksshylar 10 altyn medal ákeldi. 10 memlekettiń sportshylary qatysqan saıysta qazaqstandyq boksshylar birinshi orynǵa ıe boldy.
Qazaqstannyń boks federatsııasy habarlaǵandaı, qazaqstandyq Evgenıı Pavlov (49 keli), Orazbek Asylqulov (52 keli), Ál-Muhamed Mahmut (56 keli), Sanatáli Toltaev (60 keli), Sadrıddın Ahmedov (69 keli), Nurlan Sabyrov (81 keli) jáne Muhamedjan Taıbaǵar (91 keli) altyn medaldi jeńip alǵan. Qyzdar arasynda Aqnıet Ábdiǵoja (54 keli), Vladıslav Kýhta (60 keli) jáne Nadıra Maratova (+81 keli) Serbııa tórinde kók baıraǵymyzdy jelbiretti.
- Komandamyzdyń kórsetken oıynyna kóńilimiz tolady, - dedi boks boıynsha QR jastar quramasynyń bas bapkeri Ǵalymbek Kenjebaev. - Bul týrnır - qarasha aıynda Sankt-Peterbýrgte ótetin álem chempıonatyna daıyndyqtyń bir kezeńi. Ol bizge qalaı jumys isteý kerektigin kórsetti. Tamyz aıynda Germanııada ótetin taǵy bir halyqaralyq týrnır bar, oǵan basqa qurammen baramyz.
Bizdiń komandada básekelestik óte joǵary. Kim jaqsy daıyndalyp, ózin kórsete bilse, álem chempıonatyna sol barady. Álem boıynsha boks sporty damyp keledi. Ádettegideı Reseı men Kýba úzdik nátıjeler kórsetýde. Bul salada buryn aty shyqpaǵan memleketter de jetistikke qol jetkizýde, máselen Marokko. Osyndaı myqty qarsylastarmen shaıqasyp, ázirge jaman nátıje kórsetkenimiz joq.
