Qazaqstandyq jas boksshylar «Prezıdent Geıdar Álıev kýbogynan» 2 kúmis, 4 qola medal ıelendi
ALMATY. Mamyrdyń 17-si. QazAqparat /Erlik Erjanuly/ - Mamyrdyń 8-16 kúnderi Ázirbaıjannyń Baký qalasynda bokstan jasóspirimder arasynda «Prezıdent Geıdar Álıev kýbogy» VIII Halyqaralyq týrnıri ótti,
dep habarlaıdy QazAqparat.
On elden 130 sportshy qatysqan bul jarysqa aǵa bapker Sultan Qostaev bastaǵan ulttyq qurama tolyq quramda qatysty. Onda aqtyq synda ońtústikqazaqstandyq Baǵdáýlet Sovet (48 kg) jarys qojaıyndarynyń ókiline 6:3 esebimen, al Aqmadııar Isaq (57 kg) reseılik boksshymen 1:1 esebimen teń túsip kúmis júldeger atandy. Komanda qorjynyna túsken 4 qolany qaraǵandylyq Tabyshan Turmaǵambetov (46 kg), almatylyq Aıdar Imanǵalıev (50 kg), astanalyq Roman Jaılaýov (66 kg) pen O ońtústik Qazaqstannyń taǵy bir ókili Dinıslam Ábdeshov (75 kg) saldy. Al olardyń komandalas serikterinen Álisher Jumataev (46 kg) pen Ádilet Álibek (63 kg) mamyrdyń 11-inde, Ádilbek Ádiljan (50 kg) men Aıtjan Shleev (60 kg), mamyrdyń 12-si kúni irikteý kezeńinde jarys jolynan shyǵyp qaldy. Olardyń qataryna mamyrdyń 13-i kúni shırek fınaldan óte almaǵan Aqylbek Jolamanov (52 kg) qosylǵan edi. Jartylaı fınalda Aıdar Ázirbaıjan, al Roman Grýzııa boksshysyna utylyp qalsa, Dinıslam syrqatyna baılanysty jarysqa qatysqan joq.
