Qazaqstandyq jas balýan álem chempıony boldy
NUR-SULTAN. QazAqparat – Bolgarııanyń Sofııa qalasynda ótken kúres túrlerinen kadetter arasyndaǵy Álem chempıonatynda qazaqstandyq balýan Samatbek Іzimǵalı jeńimpaz atandy, dep habarlaıdy QazAqparat tilshisi.
Grek-rım kúresinen 45 keli salmaqta el namysyn qorǵaǵan jas balýan fınalda ózbek sportshysy Asadbek Bahramovty 4:0 esebimen bir mınýtqa jetkizbeı jeńdi.
Ol alǵashqy aınalymda kadetter arasynda Eýropa chempıony Farıd Sadıhlıdi 15:4 esebimen jarys jolynan taıdyrsa, odan keıin Úndistan, Iran jáne Ózbekstan balýandaryn aıqyn basymdyqpen utty.
Aıta keteıik, Samatbek Іzimǵalı 4-7 shilde aralyǵynda Nur-Sultan qalasynda ótken Azııa chempıonatynda da bas júldeni enshilep, chempıon atanǵan bolatyn. Mine, araǵa týra bir aı salyp, álem chempıony ataǵyna qol jetkizdi.
Erkin, grek-rım jáne áıelder arasyndaǵy kúresten Álem chempıonaty Bolgarııa astanasynda 29 shilde – 4 tamyz aralyǵynda ótti. Onda 18 jasqa deıingi er balalar men qyzdar ár kúres túrinen 10 medal jıyntyǵyn sarapqa saldy.
