Qazaqstandyq jas ánshi reseılik shoýda Meladzeniń komandasyna qosyldy
MÁSKEÝ. QazAqparat – Nur-Sultan qalasynyń turǵyny Polına Tyrına Reseıdegi «Golos» shoýynyń qaramaı tańdaý kezeńinen ótti, dep habarlaıdy «QazAqparat» HAA tilshisi.
Polına Nıkolaı Zýbovtyń «Ne ýhodı, pobýd so mnoı» romansyn oryndady.
«Sizdiń «Ne ýhodı, pobýd so mnoı» dep senimdi ándetkenińiz sonshalyq, men ony maǵan arnalyp tur dep shynaıy qabyldadym. Men ketpeımin, sizben jumys isteýge daıynmyn», - dedi kompozıtor ári prodıýser Konstantın Meladze.
Reseıdiń Birinshi arnasyna bergen suhbatynda Polına bala kúninen kontsertterge, án keshterine qatysatynyn aıtty.
«Nelikten mýzykalyq bilimińiz joq dep jurttyń bári suraıdy. Mamandyq tańdaý máselesi turǵanda ózime senimdi bolǵan joqpyn. Bala tapqan soń ǵana tek mýzykamen aınalysýym qajet ekenine kózim jetti», - dedi Polına.
Polına Tyrına – «Almas» dýetiniń qatysýshysy bolǵan. Ol Ásem Ábdiqasymovamen birge 9 tilde: qazaq, orys, aǵylshyn, frantsýz, portýgal, ıtalıan, ıspan, polıak, ýkraın tilderinde án aıtqan. 2019 jyldyń basynda olar «FRANÇAIS À LA KAZAKH» («QAZAQShA FRANTsÝZ TІLІ») atty biregeı albomyn shyǵardy. Oǵan frantsýz tiline aýdarylǵan qazaqtyń 5 halyq áni, olardyń tupnusqalary, sondaı-aq buryn jarııalanbaǵan frantsýzsha 5 avtorlyq áni kirdi.
Polına Astanadaǵy polıtehnıkalyq kolledjdi bitirgen, týrızm menedjeri. F.M. Dostoevskıı atyndaǵy Omby memlekettik ýnıversıtetin bitirip, jýrnalıst dıplomyn alǵan. Biraq mamandyǵymen jumys istemegen.
Óziniń aıtýyna qaraǵanda, mýzykaǵa jas kezden óte beıim bolǵan.
