Qazaqstandyq jáne sheteldik kınojuldyzdar Astanada qyzyl kilemmen júrip ótti
ASTANA. QazAqparat - 1 shilde kúni Astanada XIV Halyqaralyq «Eýrazııa» kınofestıvali óz jumysyn bastady, dep habarlaıdy QazAqparat.
Festıvaldiń resmı saıtynda málim etilgendeı, tańǵy saǵat 9:00-den «MegaSilkWay» jáne «Han Shatyr» saýda, oıyn-saýyq ortalyqtaryndaǵy «ChaplinCinemas» kınoteatrlar jelisinde festıval fılmderiniń tegin kórsetilimi bastaldy.
Saǵat 10:00-den bastap «WyndhamGardenAstana» qonaq úıinde halyqaralyq qazylar alqasy men qysqametrajdy fılmderdiń qazylar alqasynyń, reseılik akter Andreı Sokolovtyń qatysýymen baspasóz máslıhaty ótti. Sondaı-aq jýrnalıstermen kópten kútken áıgili frantsýz akteri Vensan Kassel kezdesti.
Baspasóz máslıhatyna «Eýrazııa» HKF-niń Prezıdenti Aıman Musaqojaeva, QR Mádenıet jáne sport vıtse-mınıstri Aqtoty Raıymqulova, 71-Kann kınofestıvalinde «Eń úzdik áıel róli» nomınatsııasyn alǵan aktrısa Samal Eslámova jáne taǵy basqalar qatysty.
Saǵat 15:00-de «MegaSilkWay» SOO-nyń «Chaplin» kınoteatrynda rejısser Maıvenı LeBeskonyń «Meniń patsham» fılminiń kórsetilimi men frantsýz akteri Vensan Kasselmen kórermenderdiń kezdesýi ótti.
Keshkisin XIV Halyqaralyq kınofestıvaldiń saltanatty ashylý rásimi ótti. Qyzyl kilemnen «Eýrazııa» HKF-niń Prezıdenti Aıman Musaqojaeva, otandyq kıno metrler Asanáli Áshimov, Nurjuman Yqtymbaev, Satybaldy Narymbetov, Smaǵul Elýbaı, Ermek Tursynov jáne festıval qonaqtary - frantsýz akteri Vensan Kassel,serbııalyq kınorejısser, akter jáne mýzykant Emır Kýstýrıtsa, reseılik teatr jáne kıno juldyzdary, sondaı-aq «A» sanatyndaǵy halyqaralyq kınofestıvalderdiń jetekshileri, kınoındýstrııadaǵy ataqty sarapshylar men synshylar, tanymal mádenıet qaıratkerleri júrip ótti.
Kıno merekesiniń aıtýly oqıǵasy Emır Kýstýrıtsa men onyń «TheNoSmokingOrchestra» atty tobynyń kontserti boldy. Kesh sońynda qazaqstandyq rejısser Qýat Ahmetovtiń «Árýaq» fılminiń álemdik premerasy boldy.
Búgin festıvaldiń baspasóz ortalyǵynda («WyndhamGardenAstana») (saǵat 11:00-de) kınorejısser, stsenarıst, prodıýser Anna Melıkıanmen jáne reseılik teatr jáne kıno aktrısasy Ravshana Kýrkovamen, sondaı-aq (saǵat 15:00-de) serbııalyq kınorejısser jáne kıno akter Emır Kýstýrıtsamen tilshilermen kezdesýi ótedi.
