Qazaqstandyq jáne sheteldik dıplomattar astanada aǵash otyrǵyzdy

NUR-SULTAN. QazAqparat – Qazaqstandyq jáne sheteldik dıplomattar búkil el boıynsha ótken aǵash otyrǵyzý aktsııasyna qatysty. Sharaǵa 150-den astam adam atsalysty. Onyń ishinde otbasy múshelerimen birge kelgen 70-ke jýyq dıplomatııalyq korpýs ókili bar. Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.

Elordada kógaldandyrý úshin ártúrli alańdar, atap aıtqanda Uly dala, Shyńǵys Aıtmatov kóshesi, Qazaqstan Táýelsizdiginiń 25 jyldyǵyna arnalǵan monýmenttiń janyndaǵy skver jáne Botanıkalyq baq tańdaldy. Onda qaraǵaı, qaıyń, shaǵan, terek, jóke, bórtegúl, úıeńki jáne alma aǵashtary otyrǵyzyldy.

«Syrtqy saıası vedomstvoǵa bekitilgen ýchaskede SІM basshysy Muhtar Tileýberdi astanany kógaldandyrý boıynsha aktsııaǵa qatysýǵa nıet bildirgen mınıstrlik qyzmetkerleri men dıplomatııalyq korpýsqa alǵys aıtyp, aktsııaǵa qatysýshylarmen birge birneshe aǵash otyrǵyzdy. Sonymen qatar, osyndaı aktsııalar júıeli túrde ótkiziletinine senim bildirdi, sebebi bizdiń qalany jasyl jáne gúldendirý óte mańyzdy ekenin atap ótti.Sondaı-aq, dıplomattarǵa alǵys aıtý úshin is-sharaǵa qala ákimi Altaı Kólginov te kelip qatysty», - delingen vedomstvo aqparatynda.

Búgingi ekologııalyq sharaǵa Qazaqstan Prezıdenti Qasym-Jomart Toqaevtyń da qatysqanyn jazǵan bolatynbyz.

Aıta keteıik, Nur-Sultan qalasynda 16 qyrkúıek-13 qazan aralyǵynda ekologııalyq aılyq ótip jatyr. Onyń aıasynda 12 qazan kúni Nur-Sultanda aǵash otyrǵyzý aktsııasy ótetini belgilengen edi.

Búkilálemdik jasyl jelek otyrǵyzý kúnine oraılastyrylǵan shara elimizdiń barlyq óńirinde qoldaý tapty.

QR Ekologııa, geologııa jáne tabıǵı resýrstar mınıstri Maǵzum Myrzaǵalıev atap ótkendeı, 12 qazan kúngi kampanııa barysynda jáne jalpy kúz aıynyń sońyna deıin respýblıkada 1 mıllıonǵa jýyq aǵash otyrǵyzylady.