Qazaqstandyq jáne reseılik «Mahabbat tálkegi» atty kórkem fılm kórermenderge jol tartady
ALMATY. Naýryzdyń 16-sy. QazAqparat /Názıra Eleýhan/ - Sh.Aımanov atyndaǵy «Kazaqfılm» AQ-y, «Interfest» kompanııasymen birigip, «Mahabbat tálkegi» atty romantıkalyq komedııany prokatqa jiberedi. Fılmniń premerasy bir ýaqytta tórt elde - Qazaqstanda, Reseı men Ýkraınada jáne Belarýsta kórsetiletin bolady,
dep habarlaıdy QazAqparat.
Kórkem fılmniń rejıssery reseılik Aleksandr Chernıaev jáne qazaqstandyq rejısser Erjan Rústembekov. Kıno týyndy Danııar Kúmisbaev, Erjan Rústembekov jáne Vladımır Zabalýevtyń stsenarııi boıynsha túsirildi. Fılmniń mýzykasyn jazǵan reseılik ánshi, ári kompozıtor Arkadıı Ýkýpnık. Fılmge «Kúndizgi sholǵynshy», «Toǵyzynshy rota», «Úlken qaladaǵy mahabbat» atty fılmderde oınaǵan ártis Alekseı Chadov, «Reketır», «Mahambet qylyshy» týyndylaryna túsken Ásel Saǵatova, sonymen qatar, Irına Rozanova, Erik Joljaqsynov, Farhat Ábdiraıymov, Olga Orlova, Natalıa Rýdova, Marına Chernıaeva, Gosha Kýtsenko, Artýr Smolıanınov syndy akterlar túsken.
«Bul fılm uzaq kútken qazaqstandyq jáne reseılik joba. Fılmniń kóshirmesi alǵash ret 600 danamen shyǵady. Buǵan deıin 50-den asqan emes. Bul birinshiden, ekinshiden bir emes tórt eldiń iri kıno oryndarynda kórsetiletini bizdiń kınematografııa úshin úlken jetistik», dedi «Kazaqfılm» AQ-nyń prezıdenti Ermek Amanshaev.
