Qazaqstandyq jáne reseılik ánshilerdiń bir sahnada án salýy kópke deıin este qalady - Andreı Malahov
ASTANA. QazAqparat - OKQ-de ótken brıfıngte Reseılik belgili telejúrgizýshi Andreı Malahov «MÝZ-TV» syılyǵyn tabystaý rásimine kelgende Astana áýejaıynda ózin shashý shashyp qarsy alǵanyn aıtty.
Aıta keteıik, búgin tańerteń Astanaǵa sharanyń júrgizýshiler Maksım Galkın, Andreı Malahov, Ksenııa Sobchak, Lera Kýdrıavtseva, sondaı-aq, ánshiler Nıkolaı Baskov pen Fılıpp Kırkorov ushyp keldi. Olardy mýzykanttar qazaqtyń ulttyq aspaptarymen án oınap qarsy alsa, ulttyq kıim kıgen qyzdar shashý shashqan. «Qýanyshpen qarsy alǵandaryńyzǵa rahmet. Biz tańerteń erte ushyp keldik. Aspannan jaýǵan kámpıtter, qushaq-qushaq gúlder, áýelegen án, barlyǵy keremet boldy. Men Astanada úsh jyldan beri bolǵan joqpyn. Sondyqtan, qalany aralaǵan kezde munda EKSPO-2017 kórmesi men MÝZ-TV syılyǵyn tapsyrý rásimin ótkizý ıdeıasy óte oryndy ekenin túsindim. Meniń oıymsha, búgingi sharamyz astanalyqtardyń ystyq yqylasynan jańa serpin alyp, qazaqstandyq jáne reseılik ánshilerdiń bir sahnada án salýy kópke deıin este qalady. Armannyń (Dáýletııarov) sharany osy qalaǵa aýystyrǵany óte durys bolǵan. Bul sharaǵa jańa ekpin men sony jańalyqtar ákeletini sózsiz», - dedi ol.
