Qazaqstandyq jáne ońtústikkoreıalyq bıznesmender Astanada telemedıtsına ortalyǵyn ashty
ASTANA. QazAqparat - Astana ákimi Áset Isekeshev qaladaǵy emhanalardyń biriniń bazasynda jeke ınvestorlar ashqan qazaqstandyq-ońtústikkoreıalyq telemedıtsına ortalyǵymen tanysty, dep habarlaıdy QazAqparat elorda ákimdiginiń baspasóz qyzmetine silteme jasap.
Ortalyqtyń telekommýnıkatsııalyq júıesi jelidegi abonentterdiń aýdıovızýaldy ózara is-áreketin jáne «Family Clinic» mamandary men sheteldik tar beıindi mamandardyń patsıenttermen, sondaı-aq, zertteýge beriletin barlyq qujattarmen birlesken jumysyn qamtamasyz etedi. Bul beınekonferentsııalyq keshenniń quramyna ozyq qural-jabdyqtarmen jaraqtalǵan basqarý ortalyǵy, jaǵdaıattyq bólme, zerthana, dıagnostıkalyq jáne rentgen-kabınetter kiredi.
«Halyqtyń densaýlyǵyn qorǵaý - Memleket basshysy belgilep bergen negizgi basymdyqtardyń biri jáne bizdiń elordamyzda medıtsınalyq klaster qalyptasyp keledi. Respýblıkanyń eń ozyq medıtsınalyq ortalyqtary osynda ornalasqan. Qazir biz Astanada densaýlyq saqtaý salasyn ary qaraı damytý baǵdarlamasyn ázirlep jatyrmyz. Jaqynda týberkýlezden emdeý aýrýhanasy, «jedel járdem» ortalyǵy ashylady. Densaýlyq saqtaý salasyna jeke ınvestıtsııalar salynyp, kásipkerlerdiń osyndaı mańyzdy jobalarǵa qarjy quıýǵa daıyn ekendigi qýantady», - dep málim etti jobanyń tanystyrylymy barysynda Astana ákimi Áset Isekeshev.
