Qazaqstandyq jáne mysyrlyq áýe kompanııalary Mysyrdan kele almaı jatqan 147 Qazaqstan azamatyn elge jetkizýge ázir - Azamattyq avıatsııa komıteti

Bul týraly seısenbi kúni QazAqparat tilshisine Kólik jáne kommýnıkatsııa mınıstrligi Azamattyq avıatsııa komıteti tóraǵasynyń orynbasary Baıanbek Smaǵulov habarlady.

Onyń aıtýynsha, Azamattyq avıatsııa komıteti qazaqstandyq Trast áýe kompanııasy jaldaǵan ekıpajy bolgarlyq AN-320 ushaǵynyń Almaty-Hýrgada-Almaty baǵyty boıynsha ushýyna ruqsat bergen joq, sebebi bolgarııalyq ol laıner 2010 jyldyń qańtar aıynyń sońyna deıin tek Taılandqa charterlik reıster jasaýǵa ruqsat alǵan. «Biz bolgarııalyq ushaqtyń Qazaqstannan Mysyrǵa jáne keri baǵytta ushýyn jón kórip otyrǵan joqpyz, sebebi qazaqstandyq jáne mysyrlyq ushqyshtardyń ózderi de mundaı reısterdi oryndaı alady. Bizdiń ushqyshtarymyzdyń ózi jumyssyz otyr», dep atap kórsetti B.Smaǵulov óz sózinde.

Qazirgi tańda qazaqstandyq SCAT kompanııasy men birqatar mysyrlyq áýe kompanııalary bizdiń azamattarymyzdy Mysyrdan ákelýge ázir ekendikterin bildirip otyr. «Bul bizdiń azamattarymyzdy eline jetkizýdi uıymdastyra almaı otyrǵan týroperatordyń problemasy», deıdi Kólik jáne kommýnıkatsııa mınıstrligi Azamattyq avıatsııa komıteti tóraǵasynyń orynbasary.

Budan buryn birqatar aqparattyq agenttikter habarlaǵandaı, Qazaqstannyń 147 azamaty qańtardyń 11-inen beri Mysyrdan elge orala almaýda. «On travel» týrıstik kompanııasynyń bas dırektory Natalıa Lınnıktiń aıtýynsha, bul oqıǵaǵa «QR Kólik jáne kommýnıkatsııa mınıstrliginiń Trast áýe kompanııasynyń ushaǵyna Almaty-Hýrgada-Almaty baǵyty boıynsha ushýyna ruqsat bermeýi» sebep bolyp otyr. «Osy sheshim reısterdiń keshigýine soqtyryp, bizge de, áýe kompanııasyna da úlken qarjylyq shyǵyn ákeldi», -deıdi N.Lınnık hanym. Onyń sózine qaraǵanda, qazirgi ýaqytta qazaqstandyq týrıster týrıstik kompanııanyń esebinen Hýrgadada qonaqúılerge jaıǵastyrylǵan.