Qazaqstandyq jamaǵat kishi qajylyǵyn óteýde
ASTANA. QazAqparat - Búgin Qazaqstan qajylary Mádınadan Mekke qalasyna kelip, kishi qajylyǵyn oryndaýda. Mekke men Mádınanyń qasıetti oryndaryna minájat etýge álemniń túkpir-túkpirinen 2 mln.nan astam musylman jınalady dep kútilýde. Qazaqstannan da bıyl bes paryzdyń biri - qajylyqty óteýge 3 myń adam attandy, dep habarlady www.muslim.kz QMDB Qajylyq mıssııasynyń aqparat bólimine silteme jasap. .
Alla Taǵalanyń jer betindegi birinshi meshiti Qaǵbany táý etip, qasıetti jerlerge duǵa jasaýǵa kelgen musylmandarda esep joq. Qazir 3 mln.nan astam halqy bar Mekke qalasynda ómir qaınap jatyr. Álemniń ár qıyrynan kelip jatqan musylmandar Qaǵbany táýap etip, kishi qajylyǵyn oryndaǵannan keıin úlken qajylyqqa daıyndalady. Al, úlken qajylyq 8 qyrkúıekte bastalady.
«Qazir elimizden qajylyq paryzyn óteýge kelgen qajylar Mekke qalasyna jınalýda. QMDB Qajylyq mıssııasy qajylardyń Mekkege qaýipsiz jetýin, qonaq úılerge ornalasýyn baqylaýda. Qajylyq kompanııalarynyń qyzmet sapasyna tekseris júrgizilip, qajylardyń qaýipsizdigi de qadaǵalanýda», - dedi QMDB Qajylyq mıssııasynyń jaýapty ókili Jándillá Bekjigitov.
Jyldaǵy dástúr boıynsha QMDB Qajylyq mıssııasynyń músheleri - bilikti, joǵary sanattaǵy dárigerler qajylarymyzdyń densaýlyǵyn 24 saǵat boıy baqylasa, dintanýshy-ǵalymdar men tájirıbeli ımamdar uly saparda týyndaǵan suraqtarǵa jaýap berip, dinı rásimderdiń durys atqarylýyna jiti kóńil bólýde.
