Qazaqstandyq jaǵajaı voleıbolshylary Shveıtsarııadaǵy Álemdik týr kezeńine qatysýda
ALMATY. 9 shilde. QazAqparat - Shveıtsarııadaǵy Gshtaadta jaǵajaı voleıbolynan «Grand Slema» Álemdik týr dodasynyń kezeńdik jarysy ótip jatyr.
Sársenbide bastalǵan bul jarys erteń óz máresine jetedi. Onda el quramasynyń úzdigi Alekseı Sıdorenko men Aleksandr Dıachenko reıtıngi boıynsha jarysty toptyq synnan bastady. Olar venesýelalyq (21-19, 21-17) jáne jańa zelandııalyqtardy (21-13, 21-14) utyp, tek amerıkandyqtarǵa (19-21, 19-21) ǵana utyldy. Osyǵan qaramastan olar endi búgin jáne erteńgi pleı-off kezeńinde baq synamaq. Al Dmıtrıı ıAkovlev pen Alekseı Kýleshov jarystyń negizgi kestesine kire almady. Birinshi kezeńde Ońtústik Afrıka Respýblıkasynan kelgen qarsylastaryn 2:1 (21-18, 13-21, 15-12) etip utqan olar, ekinshi kezeńde jarys qojaıyndaryna dál osyndaı eseppen ese jiberip, 40 upaımen 33-inshi oryndy qanaǵat tutty.
