Qazaqstandyq jaǵajaı voleıbolshylary «Grand Slam» álemdik týrynyń Brazılııadaǵy kezeńdik jarysynyń 1/16 fınalynda óner kórsetýde
ALMATY. 11 qazan. QazAqparat - Jaǵajaı voleıbolynan Brazılııanyń San-Paýlý qalasynda ótip jatqan «Gran Slam» álemdik týrynyń kezeńdik jarysynda qazaqstandyq 3 juptyń bireýi ǵana 1/16 fınalyna shyqty.
Negizgi synda «S» tobynda polıaktarǵa 0:2, latyshtarǵa 1:2 esebimen utylyp, al pýerto-rıkolyqtardy 2:1 esebimen jeńgen Alekseı Sıdorenko men Aleksandr Dıachenko búgin 1/16 fınalda jarys qojaıyndarymen kúsh synasýda. Eger bul saıysta basym tússe 1/8 fınalda brazılııalyqtardyń kelesi bir jubymen kezdesetin bolady.
Olardyń komandalas serikteri Dmıtrıı ıAkovlev pen Alekseı Kýleshov 8 qazan kúni bastalǵan jarystyń dárejelik 1-raýndynda ýkraındyqtarǵa 0:2 esebimen utylyp qalǵan edi. Jarys jolynan erte shyqqan Dmıtrıı men Alekseı sonyń nátıjesinde 41-oryn men reıtıngtik 80 upaıdy qanaǵat tutqan bolatyn. Al erler quramasynyń úzdikteri sııaqty jarysty birden negizgi kezeńnen bastaǵan Tatıana Mashkova men Irına Tsımbalova bolsa, amerıkandyqtar men brazılııalyqtarǵa 0:2, nıderlandyqtarǵa 1:2 esebimen ese jiberip, 25 orynǵa taban tiredi. Sondaı-aq reıtıngtik qorjynyna 240 upaı qosty.
