Qazaqstandyq zań ǵylymynyń qalyptasýy - eń aldymen akademık Zımanovtyń eńbegi - Muhtar Qul-Muhammed
ASTANA. 16 aqpan. QazAqparat /Aınur Kenebaeva/ - Qazirgi tańdaǵy qazaqstandyq zań ǵylymy keshegi Keńes odaǵyndaǵy, Ortalyq Azııadaǵy keńinen tanylǵan zań ǵylymy bolyp qalyptassa, bul eń aldymen búkil ómiri halqyna, eline, sol halqynyń rýhanııatyna qyzmet etýge arnalǵan akademık Zımanovtyń eńbegi.
Búgin QR Ulttyq akademııalyq kitaphanasynda zań ǵylymdarynyń doktory, professor, QR UǴA akademıgi Salyq Zımanovtyń 90 jyldyq mereıtoıyna oraı ótkizilgen «Zań ǵylymy jáne Zımanov qoltańbasy» taqyrybyndaǵy dóńgelek ústelde QR Mádenıet mınıstri Muhtar Qul-Muhammed osylaı dedi.
Aıta ketelik, Salyq Zımanov - kórnekti zańger, otandyq zań, fılosofııa men quqyq ǵylymdarynyń qalyptasýyna úlken úles qosqan Qazaqstandaǵy qoǵamdyq-saıası oı tarıhynyń shejireshisi, ulttyq ádet-ǵuryp quqyǵyn zertteýshi ǵalym. Sonymen qatar keńestik kezeńniń salqyn saıasatynan jasqanbaı Bókeı Ordasynyń tarıhyn jańa kózqaraspen tereńinen zerttegen, Jáńgir hannyń progressıvtik qyzmetin dáleldeıtin tyń oılarǵa negizdelgen zertteý eńbekter jazǵan tulǵa.
«Salyq Zımanov - Jeltoqsan oqıǵasy kezinde bizdiń ulttyq zııaly qaýymnyń eńsesi ezilip, qabyrǵasy sógilip turǵan shaqta jastardy qorǵap alańǵa shyqqan, Kolbınniń kózinshe qazaq memlekettiliginiń kóne tarıhyn qozǵaǵan, Lenındik ult saıasatynyń halyqty ezgige salýǵa baǵyttalmaǵandyǵyn aıtyp, basshylar qateligin betine basqan batyr azamat», - dedi M.Qul-Muhammed.
Shara barysynda akademıktiń Qazaqstan Respýblıkasy memlekettiginiń qalyptasý tarıhynda alatyn orny jaıly pikirler ortaǵa salynyp, ǵalymnyń ónegeli ómir tarıhy men qoǵamdyq qyzmeti jaıly syr shertetin baıandamalar jasaldy.
Dóńgelek ústelge QR UǴA akademıgi Jabaıhan Múbárak, Senat depýtaty Qýanysh Sultanov qatysty.
