Qazaqstandyq Z.Dııas «Rolan Garrostyń» alǵashqy aınalymynda chehııalyq P.Kvıtovamen kezdesedi
ORAL. QazAqparat - Parıjde erteń bastalatyn «Rolan Garros» (Frantsııanyń ashyq chempıonaty) týrnıriniń alǵashqy aınalymynda qazaqstandyq Zarına Dııasqa myqty qarsylas tap boldy.
Jıyrma jastaǵy Zarına ózinen tórt jas úlken chehııalyq tennısshi, 2011 jylǵy Ýımbldon chempıony, álemniń altynshy raketkasy, bul týrnırde besinshi bolyp kortqa shyǵatyn Petra Kvıtovamen sheberlik baıqasady. Qarsylastar budan buryn bir-aq ret kezdesken. 2009 jyly Pragadaǵy týrnırde Zarına Petrany 6:4, 6:2 esebimen tize búktirgen. Sondyqtan chehııalyq azýly tennısshi bul joly ese qaıtarýǵa tyrysary sózsiz.
Álemdik reıtıngte 96-orynda kele jatqan Z.Dııas osyǵan deıin Strasbýrgte ótken jarystyń shırek fınalyna deıin jetken bolatyn. Sodan keıin 22 jasar amerıkandyq Krıstına Makheılden jeńilip jatyp, jaraqatyna baılanysty oıyndy jalǵastyrýdan bas tartqan bolatyn. Degenmen K.Makheıl qarsylasynyń ónerin joǵary baǵalady.
