Qazaqstandyq «WikiBilim» qory 2011 jyldyń ǵalamdyq vıkıpedııashysy atandy
ALMATY. 11 tamyz. QazAqparat /Erlik Erjanuly/ -Tamyzdyń 4-7 kúnderi Iraıldiń Haıfa qalasynda ótken «Wikimania-2011» konferentsııasynyń qorytyndysy boıynsha Qazaqstandyq «WikiBilim» qory 2011-jyldyń ǵalamdyq vıkıpedııashysy ataǵyn ıelenip (Global Wikipedian of the Year), Vıkıpedııanyń negizin qalaýshy Djımmı Ýeılstiń (Jimmy Wales) arnaıy grantyn jeńip aldy.
Jyl saıyn ár jerde ótetin bul sharaǵa bıyl álemniń 56 elinen 700-ge tarta delegat qatysqan bolatyn.
«Wikibilim»qoǵamdyq qorynyń bastamasymen qolǵa alynǵan «Qazaqsha vıkıpedııa» jobasynyń maqsaty - vıkıpedııa ǵalamdyq entsıklopedııasyndaǵy qazaqsha materıaldardy kóbeıtý jáne qazaqstandyq vıkıpedııashylardyń qaýymdastyǵyn qurý. Oǵan - «Samruq-Qazyna» ulttyq ál-aýqat qory bas demeýshi bolyp otyr. Joba júzege asyryla bastaǵanyn 3 aıdyń ishinde vıkıpedııadaǵy qazaqsha maqalalar sany 7-den 70 myńǵa deıin ulǵaıdy, entsıklopedııany qazaq tilinde belsendi paıdalanýshylar sany 4-ten 231adamǵa deıin jetken. «Wikibilim» qorynyń bul jetistigi álem vıkıpedııashylary arasyndaǵy bıylǵy jyldyń eń úzdik nátıjesi dep tanyldy. Wikimania konferentsııanyń jabylý saltanatynda sóz alǵan Djımmı Ýeıls: «qazaq vıkıpedııasy qysqa merzimde zor nátıjege qol jetkizip otyr. Osyny eskere otyryp, jyl saıyn taǵaıyndalatyn ǵalamdyq vıkıpedııashy ataǵyna bıylǵy jyly qazaqstandyq «Wikibilim» qory laıyqty dep uıǵaryldy. Biz qazaq tilindegi vıkıpedııany damytý jobasyn óz tilindegi bilim men mádenıetti damytqysy keletin basqa elder arasynda keńinen nasıhattaýymyz kerek», - degendi aıtty. Ony «Wikibilim» qorynyń jetekshisi Raýan Kenjehanuly jeltoqsan aıynda Qazaqstandaǵy «Qazaqsha vıkıpedııa» jobasynyń alǵashqy kezeńiniń qorytyndysyn shyǵarýǵa qatysýǵa shaqyrdy. Shaqyrýdy qabyl alǵan Djımmı Ýeılsti bul saparynda Astana men Almatyda bolyp, qazaq jáne basqa da Ortalyq Azııa tilderindegi vıkıpedııa bólimderiniń damýyn jan-jaqty talqylaýdy usyndy. Sondaı-aq aımaqtyq vıkı-konferentsııa uıymdastyrý maqsatynda Wikibilim qoryna óz atynan arnaıy grant taǵaıyndaıtynyn málimdedi.
