Qazaqstandyq WBA, WBO jáne IBF chempıony 30 ret jeńiske jetken nokaýtshymen aıqasady

NUR-SULTAN. QazAqparat – Jartylaı orta salmaq sanatynda óner kórsetetin kásipqoı qazaq boksshysy Nursultan Jańabaevtyń (8-0, 5 KO) kelesi kezdesýi qashan ótetindigi belgili boldy, dep habarlaıdy QazAqparat Sports.kz-ke silteme jasap.

Buryn-sońdy jeńilip kórmegen 27 jastaǵy bylǵary qolǵap sheberi 21 jeltoqsan kúni Reseıdiń Krasnoıarsk qalasynda rıngke shyǵady. Qarsylasy – 38 jastaǵy tájirıbeli venesýelalyq Ernesto Espana (30-2-1, 25 KO). Jekpe-jek on raýndqa eseptelgen.

Sol kúngi boks keshinde taǵy bir qazaqstandyq boksshy, sýperorta salmaq ókili Aıdos Erbosynuly (12-0, 8 KO) da kezekti aıqasyn ótkizedi. Onyń qarsylasy ázirge belgisiz. Shoýdyń basty jekpe-jegi reseılik Denıs Lebev (32-2, 23 KO) pen Ońtústik Afrıka Respýblıkasynan keletin Tabıso Mchýnýdyń (21-5, 13 KO) aıqasy bolmaq. Olar birinshi orta salmaqta bos turǵan WBC Silver belbeýine talasady.

Eske sala keteıik, sońǵy ret Jańabaev pen Erbosynuly 14 tamyzda Sıdneı qalasynda (Aýstralııa) jekpe-jek ótkizgen. Sol kezde Aıdos tóreshilerdiń biraýyzdan qabyldaǵan sheshimimen jergilikti Rokkı Ierkıchti (17-2, 13 KO) jeńip, WBO Global, WBA International jáne WBC Asia Continental qorǵap qalǵan bolatyn. Nursultan da tóreshilerdiń biraýyzdan qabyldaǵan sheshimimen aýstralııalyq Stıv Gagony (11-1, 4 KO) jeńip, WBA Inter-Continental, WBO Oriental jáne IBF Pan Pacific tıtýldaryn biriktirdi.