Qazaqstandyq výnderkınd Peterbýrgte 100 teńsizdik jaıly kitap shyǵarýda
ASTANA. QazAqparat - Almatylyq mektep oqýshysy Peterbýrgte óziniń «100 teńsizdiktiń balamaly dálelderi: bóletin konstantalar ádisi» degen kitabyn orys jáne aǵylshyn tilderinde shyǵarýda, dep habarlady «Ekspress-K» gazeti.
«Monografııa avtory Ádilsultan Lepes Jáýtikov atyndaǵy respýblıkalyq mamandandyrylǵan fızıka-matematıkalyq orta mektep-ınternattyń 11-synyp oqýshysy. Onyń kitabyn Sankt-Peterbor memlekettik elektrotehnıkalyq ýnıversıteti shyǵarýda», - dep habarlady basylym. «Bul kitapta teńsizdikterdi sheshýdiń kóptegen ádisi usynylǵan. Sol úshin shyǵarýdy uıǵardyq, - deıdi joǵary oqý ornynyń ókili Sergeı Vınnıkov. - Bul eńbek oqyrmannyń oı-órisin keńeıtedi. Mamandar is júzinde eki-úsh ádisti ǵana qoldanady, al myna kitapta onyń 100 amaly kórsetilgen». Ádilsultan Lepeske «Nazarbaev ýnıversıeti», Massachýsets tehnologııalyq ınstıtýty men Los-Andjeles ýnıversıteti qyzyǵýshylyq bildirip otyr. Qazaqstandyq mektep oqýshysynyń esimi Máskeýde ótken «ıÝnıor» jalpyreseılik ǵylymı jumystar baıqaýynda jáne matematıkalyq konferentsııada bas júldeni jeńip alǵannan keıin tanyla bastady. Reseı, Bolgarııa men Gonkongta shyqqan maqalalary da onyń ataǵynyń shyǵýyna septigin tıgizdi.
