Qazaqstandyq voleıbolshylar Azııa chempıonatynda úzdik ondyqty túıindedi
ALMATY. 7 qazan. QazAqparat -Dýbaı qalasynda 28 qyrkúıek pen 6 qazan aralyǵynda voleıboldan erler arasynda XVII Azııa chempıonaty ótti.
Bul básekede 21 eldiń arasynan Gennadıı Parshın jattyqtyratyn Qazaqstan quramasy 10-oryn aldy.
2011 jyly óz elinde ótken sońǵy Azııa chempıonatynda jeńimpaz atanǵan ırandyqtar bul joly da óz ataǵyn saqtap qaldy. Olar aqtyq synda bul dúbirli dodada buǵan deıin 1989, 1993, 2001, 2003 jyldary jeńimpaz atanǵan Ońtústik Koreıa sportshylaryn 3:0 (25:19, 25:22, 25:19) esebimen utty. Jalpy Azııa chempıonatynda buǵan deıin Japonııa 7 ret, Ońtústik Koreıa 4 ret, Qytaı 3 ret, Avstralııa 1 ret chempıon mártebesin ıelengen bolatyn.
Bul baıraqty básekede 1993 jyldan beri óner kórsetip kele jatqan Qazaqstan quramasy Taılandtyń Nakhonratchasım qalasyndaǵy alǵashqy jarysta 16 eldiń arasynan 2-oryn alyp, aqtyq synda koreıalyqtarǵa 3:0 (15-11, 15-5, 15-13) esebimen jeńilgen edi. Odan keıin 1995, 1997, 2005 jyldary Azııa chempıonatyna qatyspaǵan olar 1999 jyly - 11, 2001 jyly - 9, 2003 jyly - 8, 2007 jyly - 7, 2009 jyly - 5. 2011 jyly 9-orynǵa taban tiregen bolatyn.
