Qazaqstandyq voleıbolshylar 2014 jylǵy Álem chempıonaty joldamasynan tys qaldy
ALMATY. 9 qyrkúıek. QazAqparat - Avstralııanyń Kanberra qalasynda 6-8 qyrkúıek kúnderi voleıboldan 2014 jylǵy Álem chempıonatynyń irikteý týrnıri ótti. Gennadıı Parshın jattyqtyratyn el quramasy «A» tobynda Taıland pen Kýveıt voleıbolshylaryn 3:0 esebimen oısyra utqanymen, jarys qojaıyndaryna 1:3 esebimen jeńilip, 6 upaımen ekinshi oryndy ıelendi. Al barlyq qarsylastaryn qapy qaldyrǵan avstralııalyqtar kelesi jylǵy Álem chempıonatynyń joldamasyn ıelendi.
Qazaqstandyqtar úshin Álem chempıonaty joldamasyna talasýdyń sońǵy múmkindigi endi 28 qyrkúıekte BAÁ-de jalaýy kóteriletin Azııa chempıonaty bolmaq. Ótken jyly olar bul dodada 9-oryndy qanaǵat tutqan bolatyn.
