Qazaqstandyq voleıbolshy qyzdar Vetnamdaǵy halyqaralyq týrnırdiń jeńimpazy boldy
ALMATY. 9 shilde. QazAqparat - Voleıboldan 6-8 shilde kúnderi Vetnam eliniń Výngtaý qalasynda «Vetsovpetro» kýbogy úshin halyqaralyq týrnır ótti.
Onda el namysyn qorǵaǵan «Qazaqstan-2» quramasy barlyq qarsylastaryn aıqyn basymdyqpen utyp, jeńimpaz atandy. Olar jarys qojaıyndarynyń «Bia Sài Gòn Thái Bình Dương» komandasyn 3:2 jáne «Vietsovpetro» dep atalatyn taǵy bir komandasy men Avstralııa quramasyn 3:1 esebimen utyp, úsh oıynda 8 upaı jınap, barlyq qarsylastaryn qapy qaldyrdy. Bas bapker Lıýdmıla Perevertova bul týrnırde «Almatylyqtardan» Ardaq Maratova, Ekaterına Razorenkova men Natalıa Akılovaǵa, óskemendikterden («Shyǵys-QorǵasynQurylys») Alııa Batkýldına men Dıana Bortnıkovaǵa, «astanalyqtardan» Aınagúl Aıjaryqovaǵa, «qostanaılyqtardan» Anastasııa Rostovşıkovaǵa, oraldyqtardan («Gratsııa- KZ») Zarına Seıitqazınovaǵa, pavlodarlyqtardan («Ertis-Qazhrom») Dıana Kavtorınaǵa úmit artqan bolatyn.
Endi 12 shilde kúni Nınbın qalasynda taǵy bir týrnır ótedi. Ol - dástúrli «Vetnam televıdenıesi kýbogy» jarysy. Bul básekege bıyl Qazaqstan, Vetnam, Taıland, Avstralııa quramalary men Qytaıdyń «Shandong» jáne «Jiangsu» komandalary qatysqaly otyr.
