Qazaqstandyq voleıbolshy qyzdar Azııa chempıonatynda vetnamdyq qurdastarymen kúsh synasýda
ALMATY. 16 qyrkúıek. QazAqparat - Búgin Taıland elindegi Nakhonratchasımada voleıboldan áıelder arasynda ótip jatqan HVII Azııa chempıonatynyń 1/8 fınaldyq oıyndary bastaldy. Toptyq synda «A» tobynyń jeńimpazy atanǵan Aleksandr Gýtor jattyqtyratyn Qazaqstan quramasynyń bul syndaǵy alǵashqy qarsylasy «S» tobynda ekinshi oryn alǵan vetnamdyqtar bolyp otyr. Al erteńgi qarsylasy osy toptyń úzdigi bolǵan Japonııa voleıbolshylary bolmaq.
Jalpy 13 qyrkúıek kúni bastalǵan bul baıraqty básekeniń aqtyq syny jeksenbi kúni ótedi. Eki jylda bir ótetin Azııa chempıonatyna 1993 jyldan beri qatysyp kele jatqan qazaqstandyqtar buǵan deıin tek 2007 jyly ǵana kúmis júldeger atanǵan bolatyn. Al 2011 jyly Taıbeıde ótken sońǵy básekede 9-oryndy qanaǵat tutty. Onda vetnamdyqtar birde-bir ret úzdikter qatarynan kórinbese, japondyqtar 3 ret chempıon, 6 ret kúmis, 6 ret qola júldeger atandy. Sońǵy 5 chempıonatta úzdik úshtiktiń qatarynan túspeı kele jatqan olar 2011 jyly kúmis júldeni oljalaǵan edi.
