Qazaqstandyq vestern janrly fılm Varshava kınofestıvaline jol tartty
ASTANA. QazAqparat - Qazaqstandyq rejısser Tólegen Baıtókenovtiń túsirgen vestern janryndaǵy «Satash» fılmi bıyl qazannyń 12-21 aralyǵynda ótetin 34-shi Varshava kınofestıvaliniń «1-2 Competition» atty konkýrstyq baǵdarlamasyna qatysady, dep habarlaıdy QazAqparat tilshisi.
Fılmdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ jaryqqa shyǵarǵan. Bul baıqaýda álemniń túkpir-túkpirinen kelgen rejısserdiń alǵashqy nemese ekinshi ret túsirgen tolyqmetrajdy kórkem fılmderi kórsetiledi. Satash» fılmi týǵan aýylyna basyp kirgen qylmyskerlermen jalǵyz kúreske túsken ýchaskelik polıtseı týraly baıandaıdy.
Fılmniń basty keıipkeri Satash esimdi aýyldyń ýchaskelik polıtseıi aýyl turǵyndaryna kúsh jumsaǵan qylmyskerlerge tótep berip, óziniń boryshyn sońyna deıin óteıdi.«Bizdiń túsirilim toby túsirgen fılmdi osyndaı beldi kınofestıval tańdap alǵanyna qýanyp otyrmyn. Kartına kórermenderge arnalǵan janrlyq fılm bolyp shyqqan, dese de festıvalderge qatysýǵa laıyqty bolyp shyqqany mańyzdy. «Satash» fılmi - meniń alǵashqy tolyqmetrajdy týyndym. Sondyqtan bul fılmime artyp otyrǵan úlken jaýapkershilikti sezemin. Qazan aıynyń sońynda fılm otyndyq prokatqa shyǵady. Otandyq kórermenderdiń kóńilderinen shyǵady dep úmittenemin», - dedi rejısser Tólegen Baıtókenov.
1985 jyly qurylǵan Varshava kınofestıvali álemge áıgili Kann, Berlın jáne Venetsııa kınofestıvalderi sekildi FIAPF (Halyqaralyq kınoprodıýserler qaýymdastyǵy federatsııasy) tirkeýinen ótken. Festıvaldiń maqsaty - álemdik kınematograftaǵy eń jańa ári qyzyqty jobalarymen tanystyrý.
«Bizdiń maqsatymyz, fılmdi «Oskar» júldesin alǵanǵa deıin kórermenge kórsetip, al rejısserdi Kann kınofestıvalinde marapatqa ıe bolǵanǵa deıin tanystyrý. Biz álemge tanylǵan kınogerlerdiń sońynan júgirmeımiz. Mysaly, Mıhael Haneke, Krıstıan Mýndjý, Pavel Pavlıkovskı, Arı Folman, Asgar Farhadı syndy basqa da kınogerler, ataq-dańqqa jetkenge deıin bizdiń festıvaldiń qonaqtary bolǵan», - dep atap ótti Warsaw Film Festival festıvaliniń uıymdastyrýshylary.
Sondaı-aq Varshava kınofestıvalinde táýelsiz jáne ınnovatsııalyq kınolarǵa arnalǵan «Free Spirit», sondaı-aq derekti jáne qysqametrajdy fılmderge arnalǵan konkýrstyq baǵdarlamalar bar. Al konkýrstan tys baǵdarlamalar sheńberinde «Polsha klassıkasy», polshalyq qysqametrajdy fılmder jáne halyqaralyq kınofestıvalderde kórsetilgen álemdik fılmder kórsetiledi. 
