Qazaqstandyq velosportshylar Olımpıadaǵa úsh joldama jeńip aldy

NUR-SULTAN. QazAqparat - Tasjoldaǵy velosporttan Qazaqstan komandasy 2020 jylǵy Olımpıada oıyndaryna úsh joldama jeńip aldy, dep habarlaıdy Olympic.kz.

Álemdik reıtıng qorytyndysy boıynsha Qazaqstanǵa úsh kvota tıesili (2018 jyldyń 22 qazany – 2019 jyldyń 22 qazany aralyǵy). Reıtıngte qazaqstandyq sportshylar 3259,35 upaımen 19-shy orynǵa turaqtaǵan.

Olımpıadaǵa irikteý erejesi boıynsha bul nátıje arqyly tórtjyldyq dodasyna úsh sportshy jiberýge múmkindik bar. Sondaı-aq, 2004 jyldan beri bizdiń komanda toptyq synǵa joldama alyp otyr.

Búgin, 16 qarasha kúni Halyqaralyq velosıpedshiler odaǵy (UCI) Qazaqstan quramasynyń úsh joldama ıelengenin resmı túrde bekitti.

Aıta ketelik, kvota jekelegen sportshylarǵa emes, komandaǵa beriledi. 2020 jylǵy Olımpıada oıyndarynda 197 veloshabandoz synǵa túsedi (130 er adam, 67 áıel adam).