Qazaqstandyq veloshabandoz «Provans týrynyń» kezeńinde márege birinshi bolyp keldi
FRANTsIıA. QazAqparat – Veloshabandoz Aleksandr Vlasov «Astana» velokomandasyna bıylǵy maýsymdaǵy alǵashqy jeńisti áperdi. Ol Frantsııanyń ońtústiginde ótip jatqan kópkúndik «Provans týrynyń» ekinshi kezeńinde úzdik atandy, dep habarlaıdy QazAqparat komandanyń resmı saıtyna silteme jasap.
Vlasov 175 shaqyrym qashyqtyqqa sozylǵan fınaldyq kezeńde barlyq qarsylasyn shań qaptyryp, birinshi keldi.
Aleksandar kelgen soń arada 24 sekýnd ótkende máre syzyǵyn kesken nıderlandtyq Vılko Kelderman ekinshi oryn alsa, izin ala jetken qazaqstandyq Alekseı Lýtsenko úshinshi oryndy qanaǵat tutty.
«Astana» komandasynan qatysqan taǵy bir úmitker Aleks Aranbýrý osy kezeńde 11-oryn aldy.
«Jeńgenim úshin óte qýanyshtymyn. Bul meniń «Astana» quramyndaǵy alǵashqy maýsymym. Sondyqtan búgingi jeńis – men úshin óte erekshe. Bıikke kóterilip kele jatqanda Alekseı Lýtsenkony qorǵap, bárimiz birge júrip otyrdyq. Sosyn eki shabandoz bizdi shabýyldaǵan kezde men olarǵa jaýap qaıtarý úshin bar jyldamdyqpen alǵa ozyp kettim. Aramyzda bos keńistik baryn baıqaǵan soń bar kúshimdi salyp, ári qaraı toqtamaı júre bereıin dep sheshtim. Komandama kóp rahmet, men baqyttymyn», - deıdi Aleksandr qýanyshyn bólisip.
Foto: Getty Images
