Qazaqstandyq veloshabandoz Italııada jeńiske jetti
ASTANA. QazAqparat - «AstanaContinentalTeam» komandasynyń veloshabandozy Tilegen Maıdos ıtalıandyq Karnagoda bir kúndik jarysta taýdaǵy jiktelimde jeńiske jetti, dep habarlandy komandanyń saıtynda.
«Bul 8 aınalymnan turatyn saqına tárizdi jarys. Biz laıyqty nátıje kórsetýge tyrystyq. Únemi alda boldyq. Kez kelgen shabýylǵa qarsy turdyq, sóıtip, men taýda upaı jınadym. Búkil komanda jarysqa belsendi atsalysty, sońyna qaraı Ǵalym Ahmetov 3 shabandozben keıinde qalyp edi, márege 4 shaqyrym qalǵanda qýyp jetti. Oılaǵanymyzdyń bári birdeı kóńilden shyqpaǵan shyǵar, degenmen biz jaman jumys jasaǵan joqpyz», - dep áserimen bólisti Tilegen.
Qazaqstandyq komandanyń taǵy bir shabandozy Vadım Galleev Tour of China jarysynyń birinshi bóliminde ekinshi kezeńde úshinshi orynǵa ıe boldy.
